PM hoin Covid-19 sawiho a ni

Prime minister Narendra Modi kaihhruaiin nimin khan India hmar­chhak state pariat chief minister-te'n video conference hmangin Covid-19 thawh hnihna chungchang an sawiho a, chief minister Zoramthanga pawh a tel.

Narendra Modi chuan, Covid-19 chu a insiam danglam em tih leh variant hrang hrangte chîk taka chhui zui zel turin chief minister-te a chah a, "Hripui léng thawh thumna atana lo inbuatsaih lâwk ngaih pawimawh a ṭul a, 'Vaccination for All - Free for All' atan India hmarchhak state-te in pawimawh hle a ni," a ti.

Covid-19 laka invènna tur inkaih­hruainate zawm ṭhat a ṭul thu sawiin Prime Minister chuan, "Covid-19 hi ama thuin a intheh darh thei lo. Inkaih­hruai­na dan kan zawm lohna aṭangin keimahni'n kan theh darh ṭhin a ni," a ti bawk.

CM Zoramthanga chuan Mizoramin Covid-19 chungchangah leh harsatna dang hrang hrang a tawhte a sawi a; Covid vaccine tam zawk mamawh belh a nih thu leh oxygen infrastructure lama mamawhte a sawi a ni.

Chief Minister hi Health minister Dr R. Lalthangliana, chief secretary Lalnunmawia Chuaungo leh Health secretary R Lalramnghaka ten an ṭawiawm.