Lungleia RT-PCR bunna tura PIL lut titâwp turin sorkarin court a ngen

RT-PCR for Chhimbialin Lungleia RT-PCR bun a nih theihna tura Gauhati High Court (GHC), Aizawl Bench-a public interest litigation (PIL) an thehluh chu titâwp turin Mizoram sorkarin High Court a ngen.

Gauhati High Court-ah hian Health Secretary chuan July 9, 2021 khan affidavit a thehlut a; Lungleia RT-PCR kháwl bun tura sorkar hmalakna te, chhim lam district-a hripui vei dinhmun te, Covid-19 donaa hmalaknate leh Lungleia RT-PCR laboratory din tura an hmalaknate tarlangin, RT-PCR for Chhimbialin PIL an thehluh chu titâwp turin Court a ngen a ni.

Affidavit-ah hian Lunglei bakah, Mizoram chhim lam district dang zawngah TrueNat khawl bun vek a nih thu tarlan a ni a, "TrueNat leh RT-PCR rintlak dan inang reng a ni a, ṭum khata sample test theih zat a intam hleih tih loh chu," tih a ni.

Health Secretary tarlan danin, Mizoram chhim lam district-a TrueNat khawlte'n ni khata swab sample an endik theih zat chu 570 a ni a; chutih laiin, kum khat liam ta chhunga ni khata chhim lam district-a swab sample endik zat chu chawhrualin 30 a ni. Second wave-ah May 2021 khan Lunglei leh Tlabungah sample lak a pung deuh thut a, sample inhnawhkhawm (backlog) a awm dawna hriat a nih avangin ZMC-ah thawn a ni.

Civil Hospital, Lungleia RT-PCR khawl bun turin sum indaih lo chungin theihtawp chhuah a nia tarlangin Health Secretary chuan, "Ni khata sample test ngai zat chhût te, ICMR-in zawm tur hrang hrang a duante leh National Task Force on Covid-19 in a recommend loh avangtein Civil Hospital, Lungleiah RT-PCR bun a ni lo," a ti.

Health Secretary chuan, Lunglei Civil Hospital-ah RT-PCR bun ni lo mah se, Mizoram sorkarin chhim lam mipui a ngaihthah lo niin a tarlang a, "Laboratory dinna atan building hranpa buatsaih mek a ni," tiin, in sak zawh a nih hnuah RT-PCR chauh ni lo, laboratory dang pawh dah a nih tur thu a tarlang.

June 17, 2021 khan Health Secretary-in ICMR Director hnenah Lunglei Civil Hospital-a RT-PCR laboratory din chungchangah thil awm dante tarlangin thurawn a dil a, ICMR chuan June 22 khan chhángin, himna atan in mal ding zawng turin thurawn a pe niin a tarlang bawk.

Tarlan tawh angin, RT-PCR for Chhimbialin PIL an thehluh chu June 14, 2021 khan pharh a ni a, Division Bench ngaihtuah tura tih a ni. High Court chuan June 16 khan a ngaihtuah ṭan a, July 22, 2021-ah ngaihtuah leh a ni ang.