BharatNet hnuaia internet ṭha pek tur zingah Mizoram a tel

Sorkar laipui chuan tun hnai khan India rama state 16-ah BharatNet kaltlangin internet chak ṭha zawk pek a nih tur thu a puang a, chu'ng state zingah chuan Mizoram a tel a, India hmarchhak biala state paruk dang an tel bawk.

BharatNet hnuaia public private partnership hmanga thingtlang khua zawng zawng broadband service pekna tur hi sorkar laipui chuan June 30, 2021 khan a pawm tawh a, hei hi July 12, Thawhṭanni khan Telecom minister thar Ashwini Vaishnaw leh mi pawimawhte'n an thlirho a ni.

He project hnuaiah hian India rama state 16 chhunga thingtlang khaw 3,60,000-ah internet chak ṭha zawk pek tum a ni a, ni 1,000 chhunga pek chhuah hman vek tum a ni.

Project senso tur chu cheng vaibelchhe 29,430 a ni dawn a; Kerala, Karnataka, Rajasthan, Himachal Pradesh, Pun­jab, Haryana, Uttar Pra­desh, Madhya Pradesh, West Bengal, Assam, Meghalaya, Manipur, Mizo­ram, Tripura, Naga­land leh Arunachal Pra­desh-a thingtlang khaw hrang hrang chu optic fibre hmangin internet chak tak nena thlun zawm a ni ang.