Assam police nawr chhuak turin Mizoram sorkar kan phût - MZP
MZP hruaitute chuan nimin khan an pisaah thuthar thehdarhtute an kâwm a; Mizoram chhunga inkulh mek Assam police-te chu nawr chhuak turin Mizoram sorkar an phût thu sawiin, sorkar a che lo a nih chuan chêt an tum thu an puang.
MZP president B Vanlaltána chuan, Assam lamin Mizoram chhunga hma an lâk chángin Mizoramin a bei lêt ngai lo niin a sawi a, "Mizo thlám leh thlaite an tichhia a, engtinmah kan ti zui ngai lo. Kan beih lêt ve ngai loh avangin tun dinhmun hi kan thleng a ni. Kan beih lêt ve loh chuan min zuam telh telh dawn. Kan Home Minister press conference pawh kan lo ngaithla a, kan duhkhawp lo hle," a ti.
Mizoram chhung, Mizote'n huan lo ram an neihna hmun hrang hranga Assam police inkulh mekte chu rang taka nawr chhuak nghal tura Mizoram sorkar an phût thu sawiin Vanlaltana chuan, "Huaisen taka Mizoram sorkar hi a che ngam lo a nih chuan kan ram humhim tura Mizo ṭhalai che chhuakte min dang lo turin kan ngen a ni," a ti a, sorkar a chêt loh chuan chêt ngei an tum thu a sawi.
MZP President chuan, December 2018-a MNF-in sorkarna an siam a, ramri buai chinfel kawngah beiseina sang tak an neih thu sawiin, "India sorkar doa kum 20 chhung rammu tawh an nih avangin ramri buai kan neih pawh hi an chinfel theih mai kan ring tlat a, chu chu Mizo mipui beiseina pawh a niin kan hria," a ti.
July 8, 2019-a Council of Minister-in Mizoram ramri atan BEFR 1875 a pawm tih an hriatin kut an ben hial thu sawiin B Vanlaltana chuan, "Mahse, an sorkar kum thumna kan hman mekah hian tun hma zawng aiin Assam sorkarin min zuam a ni," a ti a; kum 100 tél Mizote'n huan/ lo an siam tawhna Aitlang pawh Assam-in Mizote mithmuh lai ngeia an chhuhsak thu a sawi bawk.
MZP hruaitute thusawi tlangpui
1) Ramri-ah sorkar a che lo a nih chuan a che chhuakte dang lo turin kan ngen
2) Tun hma zawng aiin Assam sorkarin min zuam
3) Kan ram chhunga inkulh Assam police-te nawr chhuah tumna kan sorkarin a nei lo
4) Lemchanna thu chhâk chhuak fo lo turin thuneitute kan ngen
5) Assam-in an rawn awp chin apiang kan chán zel dawn em ni?
6) Ramri chinfel dan thurûk ka hria, titu tan tun hi puan hun a ni dawn lo em ni?
7) Thusawi thiamna hmangin ramri hi humhalh theih a ni lo
MZP president B Vanlaltana chuan, June 30, 2021-a Serlui bialtu MLA leh Kolasib DC hoa Vairengte khawtlang leh NGO hruaitute ṭhutkhawm ṭumin MLA-in inkah a ṭul pawhin hmalak an tum thu a sawi niin a sawi a, "Mahse, tun thlengin BEFR 1875 ramri chhungah Assam police-te an la inkulh a, camp an thuam ṭha sauh sauh a ni. Kan ram chhunga inkulh Assam police-te nawr chhuah tumna tak tak Mizoram sorkar hian a nei lo," a ti.
MZP hruaitute chuan, Aitlangah loh theih loha inkah a ṭul pawha mamawh nghal tur doctor, nurse, blood bag leh medical equipment dangte sorkarin chhawp hnaih a nei lo tih sawiin, "Serlui Bialtu MLA thusawi hi lemchanna a ni tih a tilang," an ti a; ramri chungchangah lemchanna thu chhâk chhuak fo tawh lo turin thuneitute an ngen.
Ramri-ah Assam lamin an rawn nawr a, buaina a chhuah chángin Mizo mipui thlamuan tura ngaih Chief Minister leh Home Minister an ngawi rei ṭhin hle tih sawiin MZP hruaitute chuan, "Hei hi ṭha lo kan ti hle. Kan Home Minister press conference aṭanga a lan danin, Assam police-te nawr chhuah tumna a awm miah lo hi a tlàwm thlak kan ti tak zet. An rawn awp chin apiang kan chán zel dawn em ni?" an ti.
MZP hruaitute chuan, 'Ramri chinfel dan thurûk ka hria' titu tan tun hi thurûk puan chhuah hun nia an hriat thu sawiin, "BEFR 1875 kan humhalh ngam lo a, Assam official-te bulah pawh kan sawi ri ngam si lo a nih chuan, July 8, 2019-a Council of Minister thuchhuak kha hnûkdâwk leh ngam zawk rawh se," an ti a; ramri chu thusawi thiamna hmanga humhalh theih a nih loh thu an sawi.