CM pian cham lawmpui

Nimin July 13, 2021 kha chief minister Zoramthanga pian champha a ni a, a kum 77-na a ni. State chhung leh páwna ram hruaitu eng emaw zatin lawmpuina an hlân. Zoram­thanga hi July 13, 1944-ah Samthangah a piang a ni.

Zoramthanga hi prime minister Narendra Modi chuan lawmpuina hlànin, "Politics-a a tawnhriatte avang leh hmarchhak ṭhanna atana a inpekna avangtein zah a hlawh hle," a ti a, rei tak hrisel taka dam turin duhsakna a hlàn.

Union Home minister Amit Shah chuan Twitter kaltlangin lawmpuina a thawn a, "Mizo mipui tana i inpekna hi ropui ka ti a, hun kal zel turah pawh i theihna zawng zawnga Mizo mipui tana rawngbawl zel turin duhsakna sang ber ka hlan a che. Pathianin vengin awmpui tlat che rawh se," a ti.

ZPM leader Lalduhoma, MLA pawhin lawmpuina hlanin, "Vawiin i pian champhaphak a lo thleng hi ka lawmpui a che. Pathianin vengin awmpui zel che rawh se," a ti a, rei tak dam turin duhsakna a hlân a ni.