COVID-19: Mizoram dinhmun : Hripui vei 519 hmuh belh a ni

July 12, Thawhṭanni khan Mizoramah Covid-19 vei mi 519 hmuh chhuah a ni a, July thla chhungin mi 4,210 hmuh chhuah a ni tawh. Nimin khan tlai dar 5 thlengin hripui laka fihlim tawh mi 157 chhuahtir an ni a, hripui vangin mi pakhat a thi.

Covid-19 vei hmuh tharte chu mipa 246 leh hmeichhia 273 an ni a, ZMC laboratory-a hmuh chhuah mi 182, TrueNAT hmanga hmuh 33 leh RAT hmanga hmuh chhuah 304 an ni. Aizawla veng 50 leh khua/hmun dang 29-a mite an ni a; Lungleia veng pakua leh Kolasib-a veng pasariha mite an tel.

Hripui vei hmuh thar mi 519-te chu natna lang chhuak 288 leh lang lo 231 an ni a; tualchhunga kái 508 leh state páwn aṭanga lut 11 niin, tualchhunga kái zingah kàina chin hriat loh mi 163 an awm.

IDSP record angin, Mizoramah Covid-19 vei mi 24,702 hmuh chhuah a ni tawh a, mipa 13,820 leh hmeichhia 10,882 an ni. Nimin tlai dar 5 thleng khan mi 19,960 (80.80%) chhuahtir an ni tawh a, mi 113 (0.46%) thi tawhin, enkawl mek mi 4,629 (18.74%) an awm.

July 12, Thawhṭannia swab sample endik dan chu - ZMC laboratory-ah 1,813, TrueNAT hmangin district pakuaah 351 leh RAT hmangin district 10-ah 3,140 a ni a, a vaiin sample 5,304 (mipa 2,892 leh hmeichhia 2,412) niin, chuta ṭanga hripui vei hmuh chhuah 519 chu 9.78% a tling.

Thawhṭannia district-a Covid-19 positive hmuh dan chu - Aizawl district-ah mi 357, Lungleiah 60, Kolasib-ah 40, Mamitah 36, Siahaah 19, Champhaiah pali leh Serchhipah pathum an ni. ZMC-a hmuh chhuah mi 182-te chu tualchhunga kái 179 leh tun hnaia state páwn aṭanga lut pathum an ni a, symptom nei mi 40 awmin, tualchhunga kái zingah kàina chin hriat loh 31 an awm. ZMC laboratory-a hripui vei hmuh chhuah tam ber ní a ni a, hmuh chhuah zingah healthcare worker hmeichhia panga an tel.

TrueNAT hmanga hmuh chhuah mi 33-te chu tualchhunga kái 26 leh state páwn aṭanga lut pasarih an ni a, symptom nei pakua leh kàina chin hriat loh 10 an awm. RAT hmanga hmuh mi 304-te chu tualchhunga kài 303 leh state páwn aṭanga lut pakhat an ni a; symptom nei 132 an awm a, tualchhunga kái zingah kàina hriat loh 148 an awm bawk.

Mi 519 zingah naupang kum tling lo 160 chuang awmin, a zatve velin symptom an nei a, nausén kum khat tling lo pakua an tel. Kum 60 chung lam mi 35 aia tlem lo awmin, a tam zawkin symptom an nei a; kum 80 chung lam mi pathum zinga pahnihin symptom an nei a ni.

Nimin khan tlai dar 5 thlengin hripui laka fihlim tawh mi 157 chhuahtir an ni a; Aizawl district-ah mi 111, Kolasib district-ah 14, Lunglei district-ah 12, Serchhip district-ah pakua, Lawngtlai district-ah panga, Mamit district-ah pali leh Khawzawl district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,509 hmuh chhuah a ni tawh a, TrueNAT-PCR hmangin 1,604, RAT hmangin 15,588 leh Guwahati-ah pakhat hmuh chhuah a ni tawh.

IDSP tarlan danin, July 12, 2021 thlengin Mizoramah swab sample 5,31,575 endik a ni tawh a, chu'ng aṭanga Covid-19 positive hmuh tawh zat 24,702 chu 4.65% a ni. Hripui vei hmuh tawh zinga mi 20,743 chu Mizoram chhunga kái chhâwng an ni a, mi 3,959 chu Mizoram páwn aṭanga an rawn luh hnua hmuh chhuah an ni.