KHAWTHLIR

Ramri sawiho dawn
Chief minister Zoramthanga hoin vawiin hian Assembly conference hall-ah sorkar hotute leh pawl hrang hrang aiawhte'n ramri chungchang an sawiho dawn. Sawihonaah hian minister, MLA leh sorkar official-te bakah, political party - BJP, INC, MNF, PC, NPP, ZNP leh ZPM aiawh te, MKHC aiawh te, NGO Coordination Committee-a tel pawl hrang hrang aiawh te, JAC on Innerline Reserve Forest aiawhte tel tura sawm an ni.

Kawng siam tlawh
Minister of state Lalruatkima chuan nimin khan a bial chhung Vaivakawna UDPA department leh MLA fund hmanga hna thawh mekte a hmunah a tlawh a, bialtu councillor Lalfakzuala Chenkualin a ṭawiawm.

Containment zone
Sairang Dawrvenga chhungkaw 40 awmna chu nimin khan containment zone-ah puan a ni. Sairang Dinthara Khuangchera Section hmun ṭhenkhat chu containment zone nihna hlih a ni a, hmun ṭhenkhat erawh chu containment zone a la ni zui zel thung.

Buarchep buainaah FIR ziah luh a ni
Kolasib DC Dr H Lalthlangliana chuan Cachar DC hnenah lehkha thawnin, show cause notice pawh awm loin Buarchep ramah Assam-in kawng an laih thu te, mipa leh hmeichhia pawh thliar loa police-in kut an thlak thu te, Assam thil tih chu human right bawhchhiatna a nih thu te, Assam lama mi awm ṭha duh lote'n Buarchep leh a chhehvela bomb an tihpuah thute a hrilh a; heng kaihhnawihah hian Vairengte Police Station-ah FIR thehluh a nih thu a tarlang bawk.