NABARD Foundation Day lawm

National Bank for Agriculture and Rural Development (NABARD) chuan nimin khan an pisaah an din champha, Foundation Day vawi 40-na an lawm a, Agriculture minister C Lalrinsanga'n a hmanpui.

C Lalrinsanga hian 'Success Story of 17 PACS in Mizoram' tih lehkhabu a tlangzarh a, NABARD-in Mizoram Rural Bank hnena a pek mobile ATM van a vailiam bawk.

Agriculture Minister chuan, NABARD-in Mizoram tan thil tam tak an thawh tawh thu leh an thawh hlâwk thu sawiin, "Agriculture leh cooperation movement-ah phei chuan nasa takin Mizoramin kan chhawr. Mizoram sorkar chuan agriculture leh a kaihhnawih tihhmasawn kawngah ngawrh lehzualin hma a la a, hengah hian cooperative movement la lutin, ṭanrual leh thawhhona hmanga hlawhtlinna hmuh a tum mek a ni," a ti.

NABARD hi July 12, 1982-ah a ding a, kum 1989 khan Mizoramah lutin, tunah hian New Secretariat Complex-ah regional office an nei a ni.