Border Dispute Area Development Board Din vat turin JAC-in Mizoram sorkar an duh

Joint Action Committee on Inner Line Reserved Forest Demand (JAC on ILRFD) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin Border Dispute Area Development Board din thuai se an duh thu an sawi.

JAC on ILRFD chairman Ngurbiakvela Fanai chuan, Mizoram sorkarin Border Dispute Area Development Board din thuai se an duh thu sawiin, "Bairabi leh Vairengtea CM leh bialtu MLA-te ṭhahnemngaihnaa kawng laih tlang tawh tàwpah hian ramri venhim zuina turin a rang thei ang bera ṭhalaite'n a za téla an riah chilh a, a ṭul hun apianga che chhuak thei tura an inbuatsaihna tur vênbûk ngêlnghet tak sak kan tum," an ti.

Ngurbiakvela Fanai chuan, "Bairabi Zophai leh Vairengte lama rami depa hmun ṭhenkhatah mihringin kan luah loh hmunte cheibàwl a, hmasawnna lam bul ṭan nan motor kawngpui ṭha taka sial a ni tawh a, in hmun pawh 70 vel ṭheh a ni tawh," a ti a; chu'ngte chu Chief Minister, Home Minister, Argiculture Minister leh bialtu MLA-te hmalakna leh ṭhahnemngaihnaa tih a nih thu a sawi.

Sorkarin JAC-te chu ramri kaihhnawih lehkha pawimawhte hâi chhuak tura a tih angin hma an lâk thu sawiin Ngurbiakvela chuan, "Document 28 kan lâk khawm tawhte chu kumin January thla khan Home department-ah kan thehlut tawh a, tunah an kawl mek. Document pawimawh nia kan hriat pahnih zawn chhuah kan tum leh mek a ni," a ti.

JAC on ILRFD Chairman chuan, Court-a kal thei an la nih loh thu sawiin, "Reserved forest hi Mizoram ta a ni a, kum 1953 khan Assam sorkar leh Mizoram sorkar aiawhte'n inremsiamna neiin Assam sorkar an enkawl hawhtir a, document pawh kan nei. Inremsiamna hi ṭhiat turin Mizoram sorkar kan ngen dawn a, ṭhiah a nih chuan Court-ah kan kal thei ang," a ti a; lehkha pawimawh an neihte aṭangin Court-ah an chak an rin thu a sawi.

JAC general secretary Rafael Lalrinmawia chuan, nimin khan India President leh Assam Chief Minister hnenah lehkha an thawn thu a sawi a, "President hnenah Assam sorkar hmalaknaa an thil tih dik loh chungchangah constitutional head a nihna anga hma min laksak turin kan ngen a ni," a ti.

JAC on ILRFD hian July 2021 ral hmain ramri-ah vênbûk sak ṭan an tum a, chuta tan chuan pawisa thawh duh tan thawh theihna an siam a ni.