Naupangte tawrhna hmanga ṭanpuina khawn phal a ni lo

Women and Child Development hnuaia Mamit District Child Protection Unit (DCPU) chuan, naupangte tawrhna remchanga hmanga mimal emaw, páwl emawin hlâwkna tél tura ṭanpuina khawn chu phal loh a nih thu an tarlang.

Mamit DCPU hian nimin khan an district-a Covid-19 avanga nu leh pate'n an thihsan, enkawltu mumal nei lo naupangte tana sorkar laipui/state sorkara puihna awm thei chungchangah hriattirna a tichhuak a ni.

Naupangte chu an nu leh pa emaw, anmahni enkawltute'n emaw Covid-19 avanga an thihin, mahni thua fa atan lak emaw mi dang hnenah lo pek emaw chu dan kalh a nih thu DCPU chuan an tarlang a, "The Juvenile Justice (Care and Protection of Children) Act, 2015 leh Adoption Regulations, 2017 hnuaiah dan ang thlapa naupang chu enkawl (foster care) emaw, fa a tana lak (adoption) emaw turin kan inhriattir a ni," an ti.

Mamit DCPU chuan, naupangte tawrhna remchanga hmanga mimal emaw, pawl emawin hlâwkna tél tura ṭanpuina khawn chu phal loh a nih thu an tarlang a; ti lui an awm chuan dan anga hrem theih an nih thu a tarlang bawk.

Covid-19 avanga naupang harsatna tâwk mai bakah, naupang khuaikhem leh pawngsual emaw, ṭanpui ngai, enkawltu nei lo leh tihduhdah tuar hriate chu DCPO phone number - 9862997597/ 9366271078 emaw, Mamit district Child Welfare Committee phone number - 8414885265 emaw, Child Helpline number 1098/ 7627986629-ah emaw hriattir turin a ngen a ni.