MLA ni mek leh political party hruai lian zingah Election affidavit-a kum dik lo ziak an awm nual

Mizorama MLA ni mek leh lo ni tawhte zingah Assembly inthlan dawna nomination paper a thehluha affidavit-ah kum dik lo ziak an awm nual a; chu'ng zingah chuan chief minister leh Congress party president Lal Thanhawla leh MNF party president Zoramthanga te pawh an tel.

Chief minister Lal Thanhawla chu kum 2003, 2008 leh 2013-a Assembly inthlanpuiah Election Commission of India (ECI)-a affidavit a thehluhah a kum zat a ziah danah dik lo nia hriat vangin tun hnai khan a rosum neih chungchangah nen Court-ah khin a ni a; ani hi Mizoramah chuan election affidavit-a kum dik lo ziah vanga Court-a khin awmchhun a la nia hriat a ni.

Lal Thanhawla bakah hian party ṭhen­khata MLA leh politician zingah ECI-a affidavit-a kum zat a dik loa ziak an awm nual a; kum dik lote hi kum 2003, 2008 leh 2013 Assembly inthlanpuia mite an ni. Inthlan hi kum nga danah neih a ni a, inthlan leh inthlan inkara an kum zat chu kum 5 zela danglam tur a nih laiin, ṭhenkhat chu kum 9 te, kum 3 te, kum 8-te leh a dangtein a danglam hlawm.

Mizoram sorkara thuneihna chang mektu Congress party MLA zingah, Home minister R Lalzirliana chuan ECI-a affidavit a thehluhah kum 2003, 2008 leh 2013-ahte Saitual leh Ṭawi bialah dingin, a kum punna tur a dik lo hlawm. Congress party treasurer leh minister hlui H Liansailova pawh Aizawl North-II ah ṭum thum a ding a, kum 2003, 2008 leh 2013-ah kum nga zela pung tur a nih laiin, a kum punna hi ECI-a a thehluh nen a inmil lo.

Assembly speaker Hiphei chuan kum 2008 inthlanah Aizawl South-I bialah chuhin, hemi ṭum hian kum 60 a ni a, kum 2013 khan Palak bialah chuh lehin, kum 73 angin a inziak lut a; kum nga chhunga a kum punna hi 13 a ni.

Finance minister Lalsawta chu kum 2003 inthlanah Aizawl East-II bialah chuhin, hemi ṭum hian kum 60 a ni a, a hnu kum nga, 2013-ah chuan kum 67 a ni a, kum nga chhungin kum sarihin a upa tihna a ni. PWD minister Lal Thanzara pawh kum 2003-ah Aizawl North III-ah chuhin, kum 57 a ni a, kum 2013 MLA inthlanah chuan kum 64 angin a inziak a, a kum punna hi kum sarih a ni.

Opposition party lian ber MNF hruaitute zingah pawh inthlan dawna affidavit an thehluhah kum dik lo ziak an awm nual. MNF president Zoramthanga chuan kum 2003 khan Champhai leh Kolasib bialah chuhin, kum 53 a ni a, kum 2008 khan Champhai North bialah chuhin kum 62 niin, kum nga chhung (2003 aṭanga)-a a punna hi kum kua a ni. Kum 2013-ah East Tuipui bialah chuh lehin kum 69 a ni leh a, kum nga chhunga a kum punna hi kum sarih a ni a; kum 10 chhungin kum 16-in a kum a pung tihna a ni.

MNF vice pre­sident Dr R Lal­thangliana, minister hlui chu kum 2003-ah Lunglei North-ah dingin, affidavit-ah kum 48-in a inziak a, kum 2008 inthlanah chuan kum 51 niin, kum nga chhungin kum thum chauhin a upat belh. Kum 2013 inthlanah Lunglei West bialah ding lehin, kum 57 angin a inziak leh bawk.

MNF MLA K Sangṭhuama chu kum 2003 inthlanah Aizawl East-I bialah dingin kum 58 a ni a, kum 2008-ah chuan Aizawl North-III bialah dingin kum 66 a ni a, kum nga chhungin kum riatin a upat belh. Kum 2013 inthlanah chuan Aizawl West-I bialah dingin, kum 68 a ni leh a, kum nga chhungin kum hnih chiahin a upat belh a ni.

Hetih lai hian, MLA ni lai leh political party hruaitu lian zingah kum dik taka ziak an awm nual bawk. Cabinet minister ni lai zingah Thorang bialtu Zodintluanga leh Lengteng bialtu leh H Rohluna ten kum an ziak dik vek a; MPC party hruaitu a nih laia Saitual bial chuhtu leh tuna ZNP hruaitu Dr Kenneth Chawngliana chuan kum 2008 leh 2013 khan Saitual leh Tuirial bialah chuhin, kum a ziak dik.

MPC senior vice president leh MLA hlui Vanlalhlana chuan kum 2003-ah Lungpho, 2008-ah Tuikum leh 2013-ah Aizawl North-I bialahte a chuh a, a kum a ziak dik vek. Hrangturzo biala ṭum thum candidate ni tawh leh MLA hlui Lalthansanga (Chatea) pawhin a kum a ziak dik vek bawk.

MPC MLA ni lai Lalthanliana chuan inthlan ṭum hnih a chuh tawhah a kum ziak dik a; ZNP president Lalduhoma pawhin inthlan ṭum thumah a kum zat a ziak dik vek. MNF party hruaitu zingah Tawnluia, R Tlanghmingthanga leh MLA ni lai Lalruatkima te pawhin an ziak dik vek a ni.