Mizoram chhung hmun pali-ah Solar power plant din tum a ni

Power & Electricity (P&E) department chuan Mizoram chhung hmun pali-ah ni zung chakna (solar energy) hmanga kawlphetha siam chhuah­na, solar plant din turin hma a la mek.

Zawhna chhangin P&E engi­neer-in-chief L Pachuau chuan, Zoram Energy Development Agency (ZEDA) hmang­in Tlungvel ramah kawlphetha megawatt 5 siam chhuah theihna tur solar plant siam tuma hmalak mek a nih thu a sawi a, chuta tana sum mamawh zawng zawng chu Rs. 14,50,00,000 vel a nih thu a sawi.

L Pachuau sawi danin, Tlung­vel rama solar power plant siam bul ṭanna atan NEDP aṭangin Rs. 1,50,00,000 pek chhuah turin sorkarin ruahmanna a siam a, P&E department lamin sanction an dil mek. Ṭum khatah kawlphetha megawatt 5 siam chhuak thei khawp solar plant siam theih a ni dawn lo a, a bul ṭan nan megawatt 2 siam chhuak thei tura hmalak tum a ni.

Champhai district-a Vankal khaw bul ram pharh ṭha laiah pawh ni zung chakna hmangin Solar Park siam tum a ni tih sawiin L Pachuau chuan, kawlphetha megawatt 20 pe chhuak thei tura siam tum a nih thu a sawi a, "A siamna tur ram pawh en fel tawh a ni," a ti.

P&E Engineer-in-Chief sawi danin, Vankal rama Solar Park siamna atan hian sorkar laipuiin Rs. 25,00,000 a pek hmangin DPR siam a ni dawn a, sorkar laipuia Ministry of Power hnuaia inziak lut consultancy firm-te hmangin DPR siam tum a ni. Solar Park chu a din thei tur company-in an siam ang a, chuta ṭanga kawlphetha siam chhuah chu Mizoram sorkarin a lei dawn a ni.

Valkal rama Solar Park siam nan hian NEDP aṭangin Rs. 21,00,00,000 dil a nih thu sawiin L Pachuau chuan, chuta ṭang chuan kumin atan Rs. 13,00,00,000 pek turin sorkarin a ruahman niin a sawi a; Solar Park dinna tur hmun panna kawng siam hna leh sub-station dinna tur hmun buatsaih hnate chu a theih ang anga thawh ṭan a nih thu a sawi bawk.

P&E E-in-C sawi danin, Saitual bula Lungpher ramah leh Thenzawlah pawh solar power plant din tuma hmalak a ni. Thenzawla mi chu Japan Interna­tional Cooperation Agency (JICA) sum hmanga din tum a ni a, DPR an buatsaih pawh Ministry of Power kaltlangin Japan sorkar pawmpui turin an thawn tawh a ni.