KHAWTHLIR

MLA hlui L Chinzah a thi
MLA hlui L Chinzah (86) f/o Sangchhin Chinzah, Lawngtlai Council Veng chu nimin zing dar 9:10 khan Lairam Christian Medical College-ah a thi. L Chinzah hi Mizo district council hun laiin Assam-ah MLA a lo ni tawh a; Pawih-Lakher Regional Council-ah kum 1958-1964 inkar leh kum 1972-ah chairman a ni a, kum 1964-1970 inkarah chief executive member a nih bakah, kum 1972-ah CEM (administrator) a ni. Pawih (Lai) Autonomous District Council-ah kum 1988 khan CEM a ni bawk.

Thisen pe
Lunglei district-a Leite Bial ṬKP chuan Inrinni khan Lunglei Civil Hospital tan thisen unit 28 an pe a, a petute mipa 23 leh hmeichhia panga an ni. Inrinni vek khan Aizawl Civil Hospital-ah mi 53-in thisen an pe a; Lawngtlai Bazar ṬKP unit pawhin Lawngtlai District Hospital-ah thisen unit 11 an pe bawk.

IKK inkhawmpui
Isua Krista Kohhran (IKK), kraws var hmangte chuan pastor bial hrang hrangah January 26, 2018 zan aṭangin bial hmeichhe inkhawmpui an hmang a, nizan khan a ṭiak. A ṭan zanah report ngaihthlak a ni a, Inrinni khan rorel inkhawm neih a ni.

Pandal hlan
Mizoram Baptist Kohhran Hmeichhe Pawl inkhawmpui February 1-4 chhunga neihna hmun tur Lunglawn, Lungleia pandal sak chu nimin khan Lunglawn bialtu pastor Rev. R Lalthangliana'n Pathian hnenah a hlan. Pandal hi feet 180X150 a zaua sak a ni.

KTP conference
Kristian Ṭhalai Pawl (KṬP)-te chuan January 26, Zirtawpni zan aṭang khan pastor bial hrang hrangah Bial Conference an hmang a, nizan khan a ṭiak. Inrinni khan rorel inkhawm neih a ni a, bial hrang hranga thurel zingah ram pum huap eng emaw zat a awm a, chu'ngte chu KṬP General Conference-a ngaihtuah tura kal zedl tur a ni.