Smart City Symposium, USA-a telte'n An zin chanchin press mite an hrilh

January 17-18, 2018-a Chicago University Center, USA-a Smart City Symposium & Exhibition vawi hnihnaa tel Aizawl Municipal Corporation (AMC) councillor pahnih - Rosiamngheta leh Laltlanzova Khiangte te chuan Inrinni khan Aizawl Press Club-ah an zinaa an thil tawn hrang hrang thuthar lakhawmtute an hrilh.

Laltlanzova Khiangte chuan, Annual Smart City Symposium & Exhibition tel turin sawm an nih angin Rosiamngheta nen an tel ve tih sawiin, India ram

aṭangin an pahnih chauh an nih thu a sawi a; an châm chhungin khawpui hrang hranga mayor-te aṭangin khawpui enkawl dan leh thil pawimawh hrang hrangte an ngaihthlak ṭhin thu leh, Aizawla tih ve theih tur pawh thil tam tak a awma an hriat thu a sawi.

Smart city nei turin a tlachawpa thil kalpui a fuh loh ṭhin thu sawiin Laltlanzova chuan, "Khawpui hmasawnna turin zau zawka zir chian hnuah khawpui leh mipui tana ṭha tur bera kalpui ṭhin chu thil pawimawh tak a ni," a ti a; chutiang tur chuan state sorkar, Municipal leh mipuite zai khata an kal a pawimawh hle dawn tih a sawi a ni.

Rosiamngheta chuan zawhna chhangin, Aizawl khawpui hmasawnna turin faina kawnga hmalak chu thil pawimawh hmasa nia an hriat thu a sawi a; mipuite'n dan zawm an ngaih pawimawh a ṭul thu te, mi dangte ngaihchàn thiamna leh inzahtawnna a pawimawh thu te, khawpuia chengte chanchin chhinchhiahna smart data neih a ṭul thute a sawi bawk.