CM Zoramthanga lemziak inlâk bosak Boruakin rah ṭha a chhuah an beisei

March 4-6, 2020 chhunga Information & Public Relation (IPR) department, Mizoram Art Development Society (MADS) leh Mizo Photographers Society (MPS)-te'n Vanapa Hall-a Chapchar Kût Art Exhibition-a lemziak pholan zinga pakhat, chief minister Zoramthanga lem, MNF party mi leh sate'n an lâk bosak chuan lemziak mi (artist)-te tan rah ṭha a chhuah artist-te'n an beisei hlawm.

Tarlan tawh angin, Chapchar Kût Art Exhibition-ah khan MADS member mi 40-te kutchhuak lemziak 87 pho chhuah a ni a, MPS member mi 33-te kutchhuak thlalak 64 pho chhuah a ni bawk. Lemziak zinga pakhat, Lalthlanchhuaha'n CM Zoramthanga lem a ziah chu MNF mi leh sate'n duh loin March 6, 2020 khan Exhibition-a dah chu an chhuhsak a, MNF party pisa - Mizo Hnam Rûnah an dah bosak nia sawi a ni.

MNF ṭhalaite chuan Lalthlan­chhuaha'n CM Zoramthanga lem a ziah leh lemziak an lak bosak chhante chu press release hmangin March 7 khan an tarlang a, "Kan President zahawmna tibawrhbáng thei tur lemziak pho chhuah a ni chu MNF Ṭhalai chuan pawi kan ti a, kan rilru a na hle a, hetiang thil hi thleng nawn tawh lo se kan duh hle a ni," an ti.

March 9 khan Congress party ṭha­laite'n thuchhuah an siam ve leh a; Exhibition-a lemziak pho chhuah, CM Zoramthanga lem MNF mi leh sate'n an chhuhsak chu MNF President tihmualphonaa an ngaih thu an tarlang ve thung.

MADS pawhin an president Lalṭanpuia leh general secretary Vanlalhriata te hmingin March 9 khan press release an siam a, Exhibition-ah an member pakhatin CM Zoramthanga lem a ziah pho chhuah a ni chu pawi an tih thu an tarlang. Chief Minister chungah ngaihdam an dil thu te, lemziak vanga mi thinlung an hliamte chungah thupha an chawi thute sawiin, "Hetiang thil duhawm lo hi a thlen tawh lohna turin MADS chuan fimkhur takin thil a kalpui zel dawn a ni," an ti.

MADS-in press release an chhuah tûk, March 10-ah Chief Minister lem ziaktu Lalthlanchhuaha chuan MADS General Secretary hnenah lehkha thehlutin, MADS aṭanga a bàn thu a hriattir ve leh nghal a; Chapchar Kut Exhibition-a a lemziak MNF hoin an chhuhsak chu amah mimal an beihna ai mahin, art an beihna nia a hmuh thu a tarlang.

Lalthlanchhuaha chuan, MNF mite chêt dan chu art hmanga aw an chhuah theihna, an thiamna, rilru leh ngaihtuahnate hupbeh tumnaa a ngaih thu a sawi a, "Kha thil thleng kha 'thil duhawm lo' leh 'tihsual' nia in hmuh avang leh 'thleng nawn tawh lo tura' in duhnate ka hmuhin, zalen taka ngaihdan puan chhuahna platform nia a lan tâk loh avangin tel ve zelna tur niin ka hre lo a... bànna ka thehlut a ni e," a ti a; MADS chu an kal zelna turah duhsakna a hlân nghal.

Lemziak la botu MNF mi leh sate chuan lemziak chu Exhibition zawh hnu, March 9, Thawhṭanni khan a ziaktu leh neitu Lalthlanchhuaha hnenah an pe lêt nia thu dawn a ni.

Lemziak lama Mizo zinga sûlsutute zinga mi Lalbuta chuan Facebook-ah a ngaihdan a ziak a, "Kan ramah art a zalen ta lo em ni aw... Lemziak pakhat kan buaipui dan em em hi a mak a ni. Heti chuan cartoonist-te paw'n sorkar hotute sawiselna lem pawh an ziak ngam tawh dawn em ni?

"Hei hian art zalenna a tibo a, mimal zalenna Freedom of Expression a bawhchhia a ni lo maw tiin ngaihtuahna min neihtir. Politician te, ram hruaitute chu cartoon leh lemziak hmanga na tak taka sawisel an hlawh ṭhin a ni ngai asin maw le. A thlavâng hauhtu an awm ta lo kha a lungchhiat thlak ka ti bawk. Hlauh nei rêng rênga lem ziak tur em kan nih le, tiin ka ngaihtuahna a kal thui khawp mai," a ti.

Mizo zinga artist lâr leh lemziak thiam berte zinga mi Tlangrokhuma pawhin, "Tunlai boruak hi a rit khawp mai. Painting, a ziaktu leh exhibition viltute ráwn hauh loa sorkar lai party ṭhalaite'n tihluihna a an khai chhuak ringawt pawh kha a râpthlak tawh tehlul nen. Amah Thlanchhuaha thlavâng hauh a hnêka MADS hotute'n an member thil sual titua an puh lêt daihte kha, artist zawng zawngte min titláwm ngawih ngawih asin," tiin  Facebook-ah a ngaihdan a ziak ve bawk.

CM Zoramthanga lem ziaktu Lalthlanchhuaha chuan, MNF mi leh sate chêt dan avangin lemziak hrim hrim chu mipuiin an ngaihven thar hluaia a hriat loh thu a sawi rualin, "Ka lemziak chu a lâr phah khawpin ka hria a, lemziak kan hmelhriat dan pawh a thlak deuhin ka hria," a ti. A lemziak chu mi tam tak rilruah leh an hmathlirah hmasawnna thlentu a nih a beisei thu sawiin, "Public discourse a awm hi hmasawnna chi khat chu niin ka hria. Chu chuan artist-te rilruah pawh kawng hrang hrangin thil thar a tuh ka beisei," a ti bawk.

Master of Fine Arts zir zo tawh John Lalchhuanawma chuan, Lalthlan­chhuaha lemziak vanga buaina chuan Mizote zingah lemziak hrim hrim a tilâra a hriat thu leh, tun hnu zelah pawh mipuiin lemziak an ngaihven phah a rin thu a sawi a, "Hmasawnna hi eng ang chiaha teh chi nge ka hre lo nã a, art huang zauhzia erawh kan hriatthiam phah chuan ka hria. Art nihphung leh art ṭawng chhuahtir dan phung hriatna lamah hlâwkna tam tak a awm vein ka ring," a ti.

Lemziak thiam nula pakhat chuan, CM Zoramthanga lem an ziah leh MNF hoin an chhuhsak avangin lemziak a lâr phah viau loa a ngaih thu a sawi rualin, "Lemziak chu an ngaihven ve phah a, chu ai chuan a boruak hi an ngaihven lehzualin ka hria. Kha thil avang khan lemziak hian hma a sawn ka ring. Art hian thil zau tak a huam a ni tih kan hre telh telh a, mite hian huaisen taka in express nan kan hman nasat lehzual ka ring," a ti a; buaina chuan artist-te tan hmasawnna a thlen a beisei thu leh, lemziaktute'n zalenna zau tak an neihte'n zah a phu ve thu a sawi.

Artist dang Isaac Malsawmtluanga pawhin Chief Minister lemziak pholan chuan rah ṭha a chhuah dawna a hriat thu sawiin, "Mizote zingah art a lâr phah hle a, ni dangah kan issue khel ngai loh leh khel nacháng kan hriat loh ṭhin kha, voice nasa taka nei thei a ni tih a takin kan hriat phah a, Mizote beng pawh a chhu hawng turah ngai ila," a ti a; artist leh mipuite'n art an thlir dan a dik chuan Mizoramah art-in hma a sawn a rinawm thu a sawi.

Isaac Malsawmtluanga chuan, "Art hi mawina leh pawisawilo thil tàr mawi tur chauh pholanna a ni bik lo a, heng issue lian leh pawimawh tak tak politics, sakhuana, culture, society, etc. ahte artist-te'n kan ngaihdan phochhuahna a ni tih awareness kan neih phahna a nih ngei ka beisei. Chumi kan hriat chuan artist-te hi voice lian tak nei thei kan ni tih inhriain, thuam chakin kan awm ang a, Mizo mipui ang pawhin mihring timihringtu pawimawh tak pakhat leh kan rilru zalenna puan chhuahna pawimawh ber pakhat art lamah awareness neih a pawimawhzia kan hre chhuak thei ang. Chu zalenna puan chhuahna chu kan society-ah art-in zalenna a neih tawh loh chuan inen lêt kan ngai viau tawh ang," a ti.