CM nih ning tawhah CM Hawla puh

MNF ṭhalaite chuan thuchhuah siamin, tun hnaiah Mizoramah tharum thawhna leh chhiatna hrang hrang a thleng a, ram mipui mangang leh buai em ema an awm laiin chief minister Lal Thanhawla'n tun thlengin thlamuanna leh sawifiahna a la nei lo chu hriatthiam harsa an tih thu an tarlang a, "CM ngawichawi, a ṭawng chhuah chhuna mipui huatthu sawi chíng tak hian CM nih a ning hle tawhah kan ngai," an ti.

MNYF chuan, January 18, 2018-ah Mizorama Kawnkhuaah Khusoma s/o Nbauh Krauhha chu bomb a rah puah vangin a thi tih sawiin, "He lai ramri velah hian nikum kum tawp lam aṭangin silai mu lêng vel tawnga inhliam an awm nual tawh a, January 21, 2018-ah Aizawl daiah silaia inkahna a thleng bawk," an ti a; chuti chung chuan CM Lal Thanhawla chu a ngawi tlat niin an tarlang.

January 22, 2018 zanah Serkhanah Chief Minister vengtute'n 207 pick-up driver Lalbiakzuala, Sih­phir an sawisa a, damdawi-ina enkawl ngai khawpin a hliam tih sawiin MNYF chuan, "He thil thleng chungchangah Zoram pumin thu dik hriat kan duh a, CM vengtute thil tih a nih avangin CM awká hriat kan beisei a; chutih laiin kar khat a liam hnuah pawh CM a ngawi reng a, hei hi mipui tham lohna leh zah lohna lian tak niin kan ngai," an ti.