Hnahlan grape tui Champhai-in leisak
Hnahlan winery-a grape tui sâwr tawh eng emaw zat, hralhna an hriat mumal tawh loh chu Champhai Grape Growers' Society-in an leisak a, tunlai hian Hnahlan aṭangin Champhaiah an thiar mek nia thu dawn a ni.
Thu dawn danin, MLPC Act hnuaia dan anga zu zawrh a nih hnuah Mizoram grape wine siam chhuahte a hnawng nasa a, Hnahlan winery-ah hian grape tui sâwr sa litre 1,70,000 vel hralh theih lohin kum hnih an kawl tawh a; grape tui sâwr sate chu Champhai Grape Growers' Society-in Rs. 15,00,00-in an leisak dawn a ni.
Grape tui hralh theih loh vang leh harsatna dang an tawh avang hian Hnahlan Grape Growers' Society chuan kum hnih chhung chu an member-te grape thar chhuah an leisak mumal tawh lo a; kum kal ta leh nikum lama grape tui, winery-a an dah khawlte chu khawih chêt loha hun rei tak a awm tawh avang leh chhe vek thei dinhmunah a din tawh avangin inleisak turin Champhai Grape Growers' Society nen an indawr ta niin an sawi.
Champhai leh Hnahlan winery-a grape tui siam chhuah - Zawlaidi, Zo-wine leh Champ Wine-te chu a hralhna lamah a hnawn tak avangin a siam chhuaktute'n harsatna an tâwk ve ve a; Champhai Grape Growers' Society erawh chuan Guwahati-a Radiant Distillery Pvt. Ltd. hnenah litre khat Rs. 50 zela an hralh theih tak avangin, kum hnih chhungin litre 2,65,000 an hralh thei a ni.