Kum 2017-ah lirtheia chetsualnaah Mi 51-in nunna an chan
Mizoram police-a CID (Crime) chhinchhiah danin, kum 2017 chhung khan Mizoramah lirtheia chetsualna ṭum 64 a thleng a, mi 51 thiin, mi 30 an hliam. Lirtheia chetsualnaa thi zat hi kum 2016-a thi zat aiin mi 13-in an tlem zawk.
CID (Crime) chhinchhiah dan chuan, nikum chhunga lirtheia chetsualna thleng 64 zinga 46 chu thihna thlen khawp chetsualna a ni a, a dang 18-ah chuan thihna a thleng lo. January thlaah chetsualna ṭum 11 thlengin, mi 13 an thi a, hei hi thla khata lirtheia chetsualnaa thi an tam ber thla a ni.
June, September leh December thlaahte lirtheia chetsualnaah mi pasarih ṭheuh an thi a, March thlaah mi panga, February thlaah mi pali, May thlaah mi pathum leh April thlaah mi pahnih an thi a; July, August leh November thlaahte mi pakhat ṭheuh an thi a, October thlaah lirthei chetsualna vanga thi an awm lo thung.
Transport department hotute chuan, lirtheia chetsualna tam zawk chu fimkhur loh vanga thleng ṭhin a nih thu leh, chetsualna thleng ṭhin zinga eng emaw zat chu pumpelh theih nia a lan thu an sawi a; lirthei chesual khalhtute zingah rûi eng emaw zat awm mah se, ruih vang ni loa chetsualna thleng eng emaw zat a awm tih an sawi a ni.
Transport hotute chuan, kawngpui siam dan dik tâwk lo laite enfiah a, hmun hlauhawm zual laiah chhinchhiahna târ ṭul an tih thu an sawi a; driving license pek danah pawh fimkhur lehzuala hmalak ni se, nu leh pate pawhin an fate chin hriatpui se an duh thu leh, zirna-in leh hmun hrang hrangah zau zawka inzirtirna kalpui ṭhin an duh thu an sawi bawk.