IB Ministry-in social media hub siam dawn

Information and Broadcasting Minis­try chuan ramchhung district hrang hranga thuthar lar mekte a hriat theihna tur leh, sorkar laipui flagsip scheme-a mipuite ngaihdante a hriat theih nan 'Social Media Communication Hub' din a tum.

He project hnuaiah hian district tinah sorkar mit leh beng atana media mite chu contract basis-a chhawr an ni ang a, anni hian an district-a thil thlengte chu an hriattir zel dawn niin official chuan a tarlang. District chhunga mipuiten sorkar policy chungchanga an ngaihdante pawh lakhawmin, an bial chhunga thuthang lar zual bikte pawh an ngaihven zui bawk ang.

District hrang hrang aṭanga mipuite ngaihdan lakkhawmte hi central level-a lo enfiah leh zirchiang turin expert rawih an ni dawn bawk a ni.

'Social Media Communication Hub' siamna tur project kalpuina tura software supply tur hian IB Ministry hnuaia Public Sector Undertaking (PSU), Broadcast Engineering Consultants India Limited (BECIL) chuan tender a tichhuak tawh a ni.