Nih tum neih loh chuan hlawhtlin a harsa - Chief Minister
Chief minister Lal Thanhawla chuan nimin khan Serchhip Auditorium-ah YMA sub-headquarter, Serchhipin 'Education campaign' an buatsaih a hmanpui a; ṭhalaite tan nih tum neih loh chuan hlawhtlin a harsat thu a sawi.
CM Lal Thanhawla chuan, zirna sang zawk, college rap pha zingah pawh tum nghet tak leh nih tum nei lêm loa tei rawlài mai mai hmuh tur an la awm tih a sawiin, "Nih tum neih loh chuan hlawhtlinna chhan tur a awm lo. Hindi hmuhsit leh Sap ṭawnga ṭawng zah hi state páwna chhawrtlak loha Mizo ṭhalai theihna sang tak tak neite hnûk hniamtu a ni," a ti.
Lal Thanhawla chuan, kum 1980 hnu lamah AIS, CCS, SSC, bank leh sipai chi hrang hrang bakah company hna ṭha zawk thawka inziak tling an tlem telh telh chuan ram tana hmathlir thui tak neite rilru a tihah tawh hle tih sawiin, "Mizoram chhunga hna pawimawh tak takte hi hnam dangin an luah ṭan tawh a ni," a ti a; Mizote'n hnam dang hnuaia kûn an hmabak tih a sawi.
Mizoram mipui nuai 12 vel awmnaah sorkar hna 50,000 vel leh kohhran hnuaia hna thawh tur tlem azawng bak chu company emaw, hmun danga hlawh neia hna thawh tur a váng tih sawiin CM Hawla chuan,"Mipui nuai 10 zinga a tam berte'n kut hnathawhna aia eizawnna dang thawh an duh si avangin state páwn lama hna hniam aṭanga hna sang zawkte pawh melh a ngai a ni," a ti.
Chief Minister chuan zirlaite fuihin, "In nu leh pa, in pi leh pute'n zirna ṭha, zirlai ṭha leh zirna puihtu hmanraw ṭha nei miah loin India rama hna pawimawh ber berah kum 1990 hma lamah chuan an lo inziak tling tawh ṭhin a ni," a ti a; zirlaite chu an nu leh pa, an pi leh pute tih theih angte an tih ve theih loh chhan tur a awm loh thu a hrilh.
YMA-in ram leh hnam veia education campaign a buatsaih chu lawmawm a tih thu sawiin, "Campaign buatsaih chhan zirlaite'n an rilruah an hriat a, vawiina thusawite leh zirtirnate hi an vawn chhunzawm a pawimawh ber dawn a ni," a ti.
Education Campaign-ah hian resource person atan chief information commissioner (CIC) Lalduhthlana Ralte hman a ni a, Mizo ṭhalaite all India services (AIS), Central Civil Services (CCS), Staff Selection Commission (SSC) hnuaia hna te, armed force leh paramilitary force hrang hranga hnate leh corporate sector-ahte an inziah luh theih dan tur sawiho a ni.