Aizawla private hospital pahnihte Empanelment tihtawp tawh sût a ni
Mizoram sorkar chuan Aizawla private hospital pahnih - Aizawl Hospital & Research Centre leh Care Hospital-te August 10, 2017 aṭanga a pawmpuina (empanelment) a tihtawp chu nimin khan a sût a; heng damdawi-in pahnih hi sorkar empanel hospital zingah a tel leh tawh.
Mizoram sorkarin damdawi-in pahnih empanelment a tihtawp a sût chungchanga hriattirna (notification) hi nimin khan Health secretary Lalrinliana Fanai chuan a tichhuak a; notification-ah chuan, private hospital pahnihte'n Rashtriya Swasthya Bima Yojana (RSBY) hnuaiah cashless facility an pek theih tawh thu pawh tarlan a ni.
Sorkarin Aizawl Hospital & Research Centre leh Care Hospital-te a pawmpui leh takah chuan, heng damdawi-in pahnihah hian sorkar hnathawkte tan pawh inenkawlna senso, medical reimbursement a tih leh theih tawh dawn tih Health department hotute chuan an sawi.
Tarlan tawh angin, Aizawl Hospital and Research Centre (AHRC), Khatla leh Care Hospital, Dawrpui te hian RSBY an zawm duh lo a, RSBY-a inziak lut damlote an dawnsawn duh loh avangin August 10, 2017 khan empanelment a titawp a; empanelment tihtawp hi Chief Minister hoa July 11, 2017-a Mizoram State Health care Society (MSHCS) Governing Body meeting vawi 15-naah thutlukna anga tih a ni.