Bawlhhlawh paih hneh loah AMC puh

Aizawl Municipal Corporation (AMC)-a Congress Legislature Party (CLP) leh Mizoram Pradesh Youth Congress Committee (MPYCC)-te chuan, tunlaia Aizawl khawpui kawngpui síra bawlhhlawh hmuh tur awm ṭhin leh AMC-in bawlhhlawh an paih hneh loah an puh a; an paih hneh loh chhan chu kalphung (system) dik loh vang a nih thu an puang.

AMC-a CLP leh MPYCC hotute hian nimin khan MPYCC president Dr Lalmalsawma Nghaka pisaah thuthar thehdarhtute an kâwm a; Dr Lalmalsawma chuan, Mizoram sorkarin SIPMIU hmanga hmanrua leh thuam tinrenga AMC a thuam chung leh bawlhhlawh paihna motor 54 a pek belh hnuah AMC-a MNF sorkarin Aizawl bawlhhlawh paih hna an thawk zo thlâwt lo niin a sawi.

Dr Lalmalsawma chuan, Aizawl veng hrang hranga local council-in an huam chhunga bawlhhlawhte ṭha taka an paih zel theihna turin AMC sorkar chu a rang thei ang bera hma la turin a phût a, "Mizoram khua leh veng hrang hrangte'n faina leh thianghlimna kawngah nasa taka hma kan lak tawh laia kan khawpui bera bawlhhlawh paih loh inchhêk khâwl ṭhin hi a inhmeh lo a, a zahthlak kan ti hle a ni," a ti.

AMC-in Aizawl hmun ṭhenkhata free wifi a dah chungchangah Dr Lalmalsawma chuan, AMC sorkarin sum tam tak senga free wifi a pek, hman tak tak tlak si loh chu ennawn thuai turin AMC an phut tih a sawi a, "Mipui sum lak khawm hetianga ṭangkai lo taka khawral hi MNF kalphungah kan ngai," a ti a; AMC chu free wifi hmantlak loh titawp a, mipuiin an hman ṭangkai theih ngei turin wifi pe turin an phût a ni.

MPYCC President chuan, AMC-a MNF sorkar chu Aizawl khawpui enkawl zo loah leh a tlachawpa rorelna kalpuiah a puh a, "Mayor mawhphurhna hria Aizawl khawpuiin a mamawh takzet a, tuna Aizawla an rorelna hian Aizawlah leh Mizoramah MNF-te hi rorelna chang tlak an ni lo tih chiang takin a lantir a ni," a ti.

Councillor Rosiamngheta chuan, tuna AMC-in bawlhhlawh an paih hneh lo chu system dik loh vang nia sawiin, "Khawpui enkawl turin an qualify lo a, system a awm lo a, an tlin lo a ni," a ti a; SIPMIU-in bawlhhlawh paih motor 54 an pek avangin Aizawl khawpui chu fai zawk tur a nih laiin, tunah chuan a bawlhhlawh ta zawk niin a sawi.

Rosiamngheta chuan, AMC Mayor chu Aizawl phatsanah leh a hna leh mawhphurhna hre loah a puh a, "Khawpui enkawl hi mutmawh hnàrmawhah an nei lo a, sum zawnna lamah an ṭang a. Hmasawnna aiin hnungtawlh zawngin an kal a ni," a ti.

Aizawla bawlhhlawh paih kawnga ṭha zawka kal dan tur rawtna an neih chungchanga zawhna chhangin Congress party councillor-te chuan, "Tun aiin motor tam se, tun hmaa kan kal ṭhin dan ang khan kal leh ni se," an ti a; motor hman belh an rawt a, mahse, tun thlengin awmze nei thamin hman belh a la ni lo tih an sawi.

Congress party councillor-te chuan, ruling leh opposition councillor zingah inthliarna a nasa tih sawiin, "Kan bialah hna awm se, kan hre ve ngai lo a, a thawktu tur an thlan vek hnuah work order-in min rawn deng dawt ringawt mai ṭhin," an ti.

Bawlhhlawh paihtu contractor-te zingah naupang kum tling lo chawr an awm chu ṭha lo an tih thu an sawi bawk.