Driver Lalbiakzuala enkawlna senso Mizoram sorkarin a tumsak dawn

Home minister R Lalzirliana hoin nimin khan a pisaah Chief Minis­ter security leh 207 pick-up driver Lalbiakzuala, Sihphir-te inkara thil thleng chungchang sawiho a ni. Hemi chungchanga sorkar thuchhuah chuan, damdawi-ina Lalbiakzuala inenkawlna sensote chu sorkarin a tum dawn tih a tarlang.

Meeting-ah hian Sihphir awmna, Aizawl East-I bialtu MLA R Lalrinawma, Sihphir Branch YMA hruaitute leh Police hotute an tel a; Home Minister chuan, ngun taka an thu leh hla a ngaihthlakin, an thiam lohnaah inngaihdam tawn a duh thu a sawi a, "Thil pumpelh theih a nih laia Lalbiakzuala'n kut a tuar hi a pawi hle. Amah enkawlna hospital bill zawng zawng pawh sorkarin a tum ang," a ti.

R Lalzirliana chuan, thil thleng aṭangin mipui pawhin zir tur an nei tih sawiin, "Kawng laka lirthei pass kan indil chhan tam tak a awm thei a; damlohna vang te, sahimna tur atante pawh a nih theih avangin, VIP an ni emaw, ni lo emaw, in pass nacháng lirthei khalhtute'n kan zir thar a ngai a ni," a ti a; police-te pawh dan lekkawhtu an nih angin, an hnathawhnaah hawihháwm zawk leh nêlawm taka mipuite nen an indawr theihna turin ṭan lak thar an ngaia a hriat thu a sawi.

Home Minister chuan, Lalbiakzuala leh Chief Minister security-te inkar thua media lama thu dik tâwk lo a darh nasa chu pawi a tih thu a sawi a, thu chiang an hriat hma chu lamṭang nei zawnga thu dik tâwk lo thehdarh lo turin mipuite a ngen a ni.

Meeting-ah hian, January 22, 2018 zana Serkhan khuaa thil thleng chungchang Additional SP (Security) hoa an chhui chianna video thlirho a ni a, security motor inlehpelh theihna tur hmun remchang tam tak a awm tih hmuh a nih thu sorkar thuchhuah chuan a tarlang.

Lalbiakzuala hi nimin vêk khan IGP Zoram­mawia'n damdawi-inah a kan a, hman chawp atan sorkar aṭanga ṭanpuina Rs. 50,000 a pek bakah, a chhungte nen hmalak zel dan tur an sawiho nghal a ni.