KHAWTHLIR

Lungphùm phúm
Mamit bialtu MLA John Rotluangliana chuan, nimin khan an bial chhunga Dapchhuah leh Dampui khuate a tlawh. Dapchhuahah NEDP sum hmanga community hall sakna tur lungphùm a phúm a, Dampui khuaah community hall sak mek tlawhin, sak zawhna tur sum ngaihtuah a tum thu a sawi a ni.

MZP-in lawmpui
MZP chuan thuchhuah siamin, India rama civil mite chawimawina sang, Padma Shree dawng tura A Zakia (87), Siaha district thlan a ni chu lawmawm an tih thu leh an lawmpui thu an tarlang a, "Zo fate insuih-khawmna nasa taka kan lo kalpui tawh ṭhinna leh kalpui mek zelna vanga Mizoram aṭanga a dawng awm chhun a ni hi lawmawm kan ti tak zet a ni," an ti. MZP chuan, an hmalakna kal zel vanga dan loa Mizorama awm, Chakma foreigner Loki Ranjan, Khojoysuri, Lunglei district man a ni ta chu lawmawm an tih thu an sawi bawk.

NLUP sem
Horticulture department chuan nimin khan Lersia Hall, North Vanlaiphaiah NLUP hnuaia serthlum chìn thlangtute hnenah ṭanpuina an sem a, bialtu MLA, minister Vanlal-awmpuii Chawngthu-in a hmanpui. NLUP
ṭanpuina hi cheng nuai 57.34 sem chhuah a ni.

Road Safety Week
Mizoram State Road Safety Council Sub-Committee chu nimin khan Transport secretary HL Rochungnunga hoin a pisaah an ṭhukhawm a, February 12-18, 2018 chhunga Road Safety Week hman dan tur an rêl. Meeting chuan, Week pualin free medical check-up neih ni se, an ti.

Kut inthlakah thi
January 27, Inrinni zan dar 9 vel khan Siaha-a AR Road, Siahatlâh-a awm Ngaihpari leh a fanu Lalnumami te chu HC Lalsiammawii (42) w/o Ramfangzauva nen inhmu thiam loin kut an inthlak a, he mi hnu hian HC Lalsiammawii hi a thi. Hei vang hian Ngaihpari leh a fanu Lalnumami te chu Siaha police-te'n an man.