Serchhip district MJA-in conference hmang

Mizoram Journalists Association (MJA), Serchhip District chuan nimin khan Serchhip Press Club-ah Annual Conference vawi 11-na an hmang a, MJA general headquarters-a hruaitute'n an hmanpui.

Conference hi Serchhip MJA vice president C Ramengmawia'n a kaihruai a; an hun hmanpuitu MJA gen.hqrs. treasurer R Lalhmangaihzuala chuan, journalism chu hna pawimawh tak a nih avangin MJA pawh pawl pawimawh tak a nih thu a sawi a, "Hei vang hian member pawh sorkarin fîr takin a duh a, Mizoramah mi 194 chiah MJA member kan awm mek a ni," a ti. MJA chu mipui rawngbawltu a ni a, a thupui pawh ‘Mipui rawngbawl’ tih a nih thu a sawi bawk.

Serchhipa IPRO K Saitluanga'n Serchhip district MJA din tirh aṭanga thlalak chi hrang hrang an dahkhawmna, Photo Album a tlangzarh a; IPR department-in thuthar thehdarhtute tan theihtawp chhuaha hma an lak thu sawiin, "Sorkar hmalakna puanzar kawngah thuthar thehdarhtute'n zau zawka an tlawh theih nan ruahmanna siam a ni," a ti.

Serchhip district MJA president C Lalhminghlua pawhin thu a sawi a, MJA member-te chu ram leh khawtlang rawngbawlna pawimawh an thawk tih hre reng tur leh, media-a thawkte thawhhonaah inlungrualna ngai pawimawh turin a fuih.

MJA, Serchhip district hian tun hnaia Mizoram Civil Service (Combined Competitive) Examination-a MCS atana tling, Lalṭhakima Chhangte s/o Biakkhuma Chhangte, New Ser­chhip Bazar Veng hnenah lawmpuina an hlan a; kum 2018-20 chhunga an hruaitu tur an thlang bawk.

Hruaitu atan hian President-ah C.Ramengmawia, Vice President-ah Kapliana Pachuau leh Treasurer-ah R.Lalmuansanga te thlan an ni.

Serchhip district MJA-ah hian member 12 an awm mek a, chu'ngte chu Serchhipah mi pakua, Thenzawlah mi pahnih leh North Vanlaiphai-ah mi pakhat an ni.