Thenzawlah fainaa inelna lawmman sem

Thenzawl East Sanitation Committee chuan Swatchh Bharat hmalakna kal mekah, an huam chhung­a YMA branch, zir­na-in, biak-in leh a hmun bakah, pisa hrang hrangte faina kawnga inelna an buat­saih a; nimin khan Then­zawl Loṭhazawla khel­­mualah lawmman an sem.

Fai lawmman semna hun hi Thenzawl East Sanitation Committee chairman B Laldingngheta'n a kaihruai a; AYUSH Hospital, Thenzawla resident officer Dr HT Zothanmawia leh Thenzawl East Sanitation Committee member C Lalramchhana ten faina kawnga ṭan lakna turte an sawi. Inkhawmah hian khaw mipui ṭhahnem tak an tel a ni.

Thenzawl East huam chhunga YMA branch fai berah Farm Veng Branch thlan a ni a, lawmman Rs. 7,000 an hlan a; Veng­thlang Branch leh Field Veng Branch-te chu pahnihna leh pathumna niin, Rs. 5,000 leh Rs. 3,000 hlan an ni.

Biak-in leh hmun dang fai thlannaah Thenzawl Vengthlang Presbyterian Kohhran pakhatna an ni a, Field Veng Presbyterian Kohhran leh Baptist Church of Mizoram, Bethlehem-te chu pahnihna leh pathumna an ni. Office fai berah AYUSH Hospital thlan a ni a, AH&Vety pisa chu pahnihna niin, SAI Womens Hockey Hostel chu pathumna a ni.

Zirna-in zingah Victory English School chu fai berah an thlang a; Primary School-VII leh Centenary Middle School-te chu pa­hnihna leh pathumna an ni.

Kohhran, office leh zirna-ina lawmman pakhatnain Rs. 3,000 an keng a, pahnihnain Rs. 2,000 leh pathumnain Rs. 1,000 a keng bawk.