Thu belhchian dâwl lo sawiah Party 3-in MPCC Media an puh

Party pathum - MPC, ZNP leh PRISM-te chuan thuchhuah ṭintâwm siamin, Congress party-a Media department-in an pute thlavang hauh an tumnaa thu belhchian dâwl lo an sawi chu an dem thu an tarlang.

MPC, ZNP leh PRISM-te chuan, Chief Minister escort party-in kut an thlak vanga hliam, driver Lalbiakzuala, Sihphir enkawlna senso Mizoram sorkarin a tumsak dawn leh hman chawp atan Rs. 50,000 an pe chu lawmawm an tih thu an tarlang a; chutih rualin, MPCC Media department thil tih dan demin, "An pute thlavang hauh tuma thu belhchian dâwl lo an puangzar hi demawm kan ti a, thu dik tâwk lo thehdarh hmasa berah MPCC Media Cell hi kan ngai," an ti.

Party pathumte chuan, Home Minister-in lamṭang zawn tuma thu dik tâwk lo thehdarh lo tura mipui a ngenna chu MPCC Media Cell pawhin zâwm ve tawh se ṭha an tih thu an tarlang a; Lalbiakzuala kut thlak chungchangah, buaina tam tak pumpelh a nih theih nan Chief Minister-in a tìr aṭanga tun thlengin a tih tur a ti loa an ngaih thu an sawi bawk.