NIAS zirlaite'n zangnadawmna pek thuai an phût NIAS-in nuai 42 a pe lêt anga sawi an ringhlel
Nalanda Institute of Advance Studies (NIAS), Kolkata-a Bachelor of Hotel Management (BHM) zir tura Mizoram sorkarin a tirh zinga mite chuan, NIAS-a Mizo zirlaite'n Mizoram sorkara zangnadawmna an phût pe thuai turin sorkar an ngen tih a sawi a; NIAS-in Mizoram sorkarah cheng nuai 42 a pe let nia Chief Minister-in a sawi tawh chu an rinhlelh thu an sawi bawk.
NIAS-a zirlaite hian nimin khan Aizawl Press Club-ah thuthar thehdarhtute an kawm a; an zinga mi C Laltlanmawia chuan, August 29, 2014-a Mizoram Youth Commission (MYC) leh Mizoram Building & Other Construction Workers Welfare Board (MBOCWWB) leh NIAS-in thuthlung an ziah anga NIAS-a an zirnaah, NIAS chu zirna-in lem a nih avangin an hma lam hun (career) nasa taka tihchhiat a nih thu a sawi a, "Chuvangin, Mizoram sorkarin zangnadawmna min pe turin vawi duai lo kan dil a, sorkarin beng min chhutngawnsan tlat hi ná kan ti hle a ni," a ti.
C Laltlanmawia sawi danin, Aizawl City College Joint Students Union hmalaknain Chief Minister nen CM pisaah February 14, 2017-ah an inbia a; inbiaknaah hian sorkar hotute chuan zangnadawmna ngaihtuahsak an tum thu an sawi. Sorkar a ngawih zui avangin August 18, 2017 leh September 25-ah CM-ah lehkha kan thehlut nawn a ni.
NIAS chu zirna-in lem (fake institution) a nih avangin Mizoram sorkarin zirlai 32 chuang a tirhte chu sum eng emaw zat seng chungin an hma lam hun tihchhiat a nih thu sawiin Laltlanmawia chuan, "Sorkarin sum tam tak sênga zirna-in lema min tír hi sorkarin zirlaite min hralhnaah kan ngai a, human trafficking chi khat ni ngeiin a lang," a ti.
Laltlanmawia chuan, an thil phût chu sorkarin a ngaihsak zui lo a, zangnadawmna a pe mai lo a nih chuan High Court lama zualko an rilrûk thu a sawi bawk.
C Laltlanmawia chuan, February 24, 2017-a chhuak Vanglaini chanchinbuah CM Lal Thanhawla'n media-te a kawmnaah, NIAS-in Mizoram sorkarah cheng nuai 42 an pek let thu tarlan a ni tih a sawi a; chutih laiin, RTI Act hmanga an zawhfiahnaah, MBOCWWB chuan pawisa inpek kir chungchang chu an hriatpui loh thu an hriat thu a sawi.
C Laltlanmawia sawi danin, NIAS-in Mizoram sorkarah cheng nuai 42 a pe let anga Chief Minister-in a sawi avangin RTI Act hmangin Labour Employment, Skill Development & Entrepreneurship (LESDE) department-ah April 24, 2017-ah an zawtfiah a, LESDE-in an chhan theih loh avangin MBOCWWB hnenah an hlan chhawng a ni.
MBOCWWB chuan file-te LESDE Secretariat lamin an laksak avangin an chháng mumal thei lo a, LESDE Secretariat pawhin an chhan loh avangin Departmental Appellate Authority (DAA)-ah an zualko a ni. DAA chuan September 7, 2017-ah thutlukna siamin, ni 30 chhunga chhanna pe turin a ti a; a tawpah MBOCWWB chuan chhángin, NIAS-in Mizoram sorkar hnenah pawisa a pêk kîr chungchang an hriatpui loh thuin an chhang a ni.
NIAS-in Mizoram sorkara cheng nuai 42 a pe let anga CM Lal Thanhawla'n a sawi chungchang hi Assembly session-ah November 16, 2017-ah zawh a ni a, LESDE minister H Rohluna'n a chhannaah chuan, 'NIAS, Kolkata-in Mizo zirlaite zir man Mizoram sorkarah a la rawn pe lêt lo,' tih a ni.
C Laltlanmawia chuan, NIAS-in cheng nuai 42 a rawn pe let anga Chief Minister-in February 2017-a a sawi lai a, a sawi hnu thla riat hnua LESDE Minister-in Assembly House-ah pek let a nih loh thu a sawi leh si avangin Chief Minister thu sawi chu awih chin tur hriat a har thu a sawi a, "Cheng nuai 42 awmna hi a rang thei ang bera chhui chhuak a, NIAS zirlaite hnenah zangnadawmna pe thuai turin CM kan ngen a ni," a ti.
Zawhna chhangin C Laltlanmawia chuan, NIAS-a Mizo zirlai tirh chungchangah hian October 26, 2016-ah ACB-ah an thehlut tih a sawi a, "ACB-in Vigilance-ah a thlen a, Vigilance-in insawifiah turin LESDE department a hriattir a, mahse, LESDE hi an insawifiah thei lo. Kum 2017 tir lamah Vigilance-in preliminary inquiry tih phalna ACB a pe a ni," a ti a; mahse, ACB chuan tun thlengin preliminary inquiry a la zawh loh thu a sawi.
C Laltlanmawia sawi danin, zirlai 32 tirh zinga pali chuan a tîr lamah an chhuahsan a, pakhat chu a hnuah missionary-in a chhuak a, mi pahnih an thi tawh. Buaina a awm hnuah zirlai paruk an exam tluan a, mahse, exam tluan anga insawite pawhin tun thlengin result an la nei lo a ni.