KHAWTHLIR

Thisen pe
Academy of Integrated Christian Studies (AICS) chuan nimin khan Aizawl Civil Hospital tan thisen unit 51 an pe a, a petute mipa 44 leh hmeichhia pasarih an ni. Dawrpui Vengthar Presbyterian Kohhran pawhin an diamond jubilee pualin Synod Hospital tan thisen unit 30 an pe a, a petute mipa 27 leh hmeichhia pathum an ni.

MHIP-in phût
MHIP general headquarters chuan thuchhuah siamin, Lalfamkimi (37) d/o Kawlchhunga, ITI Mualpui Veng, January 27, 2018 zana a thi chu pawi an tih thu leh a chhungte an tawrhpui thu an tarlang a; Lalfamkimi thih dan chiang taka chhui chhuak vat turin thuneitute an phût tih an sawi bawk.

YMA In hawng
Minister of state KS Thanga chuan nimin khan a bial chhunga Sialsuk Branch YMA In a hawng. YMA In hi KS Thanga'n a MLA fund Rs. 5,50,000 a pek hmanga sak a ni.

Kal phal lo
Traffic SP C Lalthanmawia chuan thupek chhuahin, PWD-in February 4, 2018 zing dar 9:30 aṭanga tlai dar 4 inkarah Chanmari, Hrangbana College bul aṭangin Chanmari kâwn, Traffic Point via Axis Bank kawng siam hna an thawh dawn avangin, hna thawh hun chhung hian kawngpuiah mihring leh lirthei kal phal a nih loh tur thu a tarlang.

College week khâr
J Thankima College chuan nimin khan Electric Veng YMA Hall-ah Annual College Week khârna hun an hmang a, Higher & Technical Education minister R Romawia'n a hmanpui. J Thankima Collee hi kum 1992-a din a ni a, zirlai 600 vel an awm mek a ni.

Chapchar Kût
Lunglei Chapchar Kût 2018 Celebration Committee chu nimin khan Lunglei DC Lalzarmawii hoin a pisaah an ṭhukhawm a, Chapchar Kût lawmna atana Mizoram sorkarin sum a pek Rs. 2,00,000 chu a tlem deuha an hriat avangin, Rs. 1,00,000 dil belh a nih thu tarlan a ni.