Chief Minister-in Mercy Hospital a hawng ; Hlawh phua thawk lote an hnawksak - CM
New Serchhipa private hospital din thar, Mercy Hospital (Rural Diagnostic & Research Centre) chu nimin khan chief minister Lal Thanhawla'n a hawng. CM Hawla chuan, mahni hnaa ṭhahnem ngai lo leh sorkarin hlawh a pek phúa thawk lo sorkar hnathawkte an hnawksak tih a sawi.
Chief Minister chuan, state ṭhang lai Mizoram tan damdawi-in tam tak din a harsat laia mi tlawmngaite pên chhuakin mipui rawngbawlnaa ngaia damdawi-in an din zel chu malsawmna a nih thu a sawi a, "Damlo enkawlna mai ni lo, natna zir chianna atante thlenga Mercy Hospital-in hmalak a tum hi thil ṭha tak a ni," a ti.
Mizoramin a mamawh chu damlohna vanga phai pana inenkawl ngai loa state chhungah damdawi-in ṭha awm ve a nih thu sawiin Lal Thanhawla chuan, "Private hospital-te'n hma an sawn viau chuan sorkar hospital-te pawhin ṭan lak nacháng an hriat a ngai ang," a ti a; hriselna lam thilte chu India ram pum mamawh leh chona lian ber a nih thu a sawi.
Lal Thanhawla chuan, ram kalsiam ruhrel tam tak sorkarin a siam mek leh a rang lama tihhlawhtlin tum zingah medical college a tel thu sawiin, "Nakkumah chuan college kalpui theih beisei a ni a, hmalak belh tur leh sum sên belh tur pawh a tam tham hle a ni," a ti.
Chief Minister chuan, mahni hnaa ṭhahnem ngai lo leh sorkarin hlawh a pek phúa thawk lo sorkar hnathawkte an hnawksak tih sawiin, "Damdawi-ina thawk zingah pawh chutiang mi chu an tel," a ti a; sorkar damdawi-ina thawkte inthlahdah vang ni ngeia puh theih tura thu hriat nuam lo leh thil vanduaithlak a awm fo chu enfiah ni se a duh thu a sawi.
Mercy Hospital hi PC Lalnunpuia leh Dr Lalrinchhana Pachuau te din a ni a, thawktu mi 30 awmin, ward pangngaiah khum 20, cabin room pali, inzaina pindan, back-up ICU, nau neihna, patho & bio chem laboratory, ultrasound, digital x-ray, etc. a awm a ni.