MNF President-in Chief Minister Nih a châk chhan chu sum - MPYCC

Congress ṭhalai, Mizoram Pradesh Youth Congress Committee (MPYCC) chuan thuchhuah siamin, MNF President-in chief minister nih a châk chhan chu sum niin an tarlang a; MNF ṭhalaiten CM Lal Thanhawla'n CM nih a ning anga thu an chhuah chu zahpuiawm an tih thu an sawi bawk.

MPYCC chuan, chief minister chu duha nih a, nin huna bàn mai chi a ni lo tih sawiin, "Mipui thlan tlin nih hnuah, India danpui hmaa chhia chham hnuah chauh he nihna pawimawh tak hi thawh theih a ni," an ti a; Mizorama remna leh muanna a awm theih chhan leh tun thlenga ram rálmuang ber a nih theih chhan chu Lal Thanhawla’n Laldenga a ken vang niin an sawi.

MNF ṭhalaite chuan MNF President chu CM nih châk em em a ni tih hriat se an duh thu sawiin MPYCC chuan, "CM kum 10 chauh a nih chhungin cheng nuai 882 chuang a nei mai thei kha a ni a. CM nihna zahawm tak hi mahni sahmîm tihpuar nana hmangin khaw êng pawh zah lo, a theihna apiangah chuan a mawi leh mawi lo pawh dáwn loa sum hai bawrh bawrh ṭhin a ni," an ti.