Siaha-ah Disaster Risk Reduction Week

Nimin khan Siaha DC conference room-ah Disaster Risk Reduction Week hawn a ni a, a hawnna inkhawm hi DMR director N Chakhai-a'n a hmanpui. Week hi February 2, 2018 thleng awh tur a ni.

Week hawn inkhawm hi Siaha additional DC VL Hruaizela Khiangte-in a kaihruai a; N Chakhai chuan, Geo Hazards ho zirchianna aṭanga a lan danin, Siaha khawpui chu lirnghing thlen nat theihna hmun a nih thu a sawi a, "Kan in sak danah mithiam ràwn nacháng hre loa mahni duh thua kan sa mai ṭhin hi a pawi hle. Mi dang tan harsatna kan siam bakah, keimahni tan pawh a him loh hle a ni," a ti.

Disaster Risk Reduction Week hawnnaah hian Siahaa head of office, zirtirtu, village council leh tlawmngai pawl hruai­tute an tel a; 'Introduction to Disaster Risk Reduction' leh 'Vulnerability of Mizoram to Various Hazards' zirho a ni.