Chuhvelah Assam official-te an kal : Aitlang leh Buarchepah boruak a reh rih

15th July, 2021

Tun hnaia Mizoram leh Assam lamin buaina an neihna hmun Vairengte ram Aitlang leh Phainuam ram Buarchepah boruak ṭha lo thar a awm rih lo. Mamit district-a Chuhvel khuaah erawh chuan nimin khan Assam aṭangin Magistrate, Forest RO leh police-te an kal.

Chuhvel aṭanga Vanglaini thu dawn danin, nimin khan Assam aṭangin magistrate leh Forest RO-te chu police-te nen Mizoram police-te inkulhna hmunah an kal a, buaina erawh a awm lo. Mizoram official-te chuan Assam lamin Chuhvel ram an sâm avangin Mizo loneitute thlabár tur hnêm tur leh venghim tura awm an nih thu an lo hrilh.

An hmalakna titawp tura Assam sorkar official-te'n an ngenna chu chhángin Mizoram sorkar mite chuan, loneitute venhim an ngaih avangin an theih loh thu an lo hrilh a ni. Inbiaknaah hian Assam lam hi magistrate, RO leh police tlemtê chauh kal mah se, inbiakna hmun rawn thleng lo police 100 velin an zui a ni.

Chuhvel VC president Zorama hnen aṭanga thu dawn danin, tuna Mizoram police-te'n awmhmun an khuarna piah lam eng emaw chen chu Mizoram chhung a la ni. Chutih laiin, Assam lam chuan kawng laihna tur nia ngaih an sâm bak chu Mizoram chhungah hmalakna an nei zui rih lo.

Tarlan tawh angin, Chuhvel leh Saikhawthlir ram chhunga May 30, 2021-a John Haliday-a'n a huana thlám a sak mek, Assam lam mi uniform ha eng emaw zatin sa chhunzawm tawh lo turin an hriattir a; chumi hnuah tun hnaiah Assam lamin kawng sial an tum nia a lan avangin Mizoramin JCB hmangin a laih khalh a ni.

Assam lamin buaina an siam chhunzawm thulha inruahman lâwkna atan Mizoram sorkar chuan Chuhvel ramah police a dah a, nimin khan khawtlang mipui nen an awmna hmun tur sak a ni. Police-te hi an la intirh belh zel bawk niin thu dawnna chuan a sawi.

Hetih lai hian, tun hnaia buaina chhuahna tho, Vairengte rama Aitlang leh Phainuam rama Buarchepah chuan boruak ṭha lo thar a awm rih lo a, Mizoram leh Assam police-te chu an awmna ngaiah an la inkulh ve ve. Aitlang leh Buarchepah hian Assam police-te chu Mizoram chhungah an inkulh a ni.