Tuipuiralah ráltlân 1,457 an awm mek

Champhai district-a Tuipuiral Group YMA huam chhunga khaw 20-ah nimin khan Myanmar aṭanga ráltlân mi 1,457 an awm mek a; an zinga eng emaw zat chu relief camp-ah awmtir an ni tawh.

Tuipuiral Group YMA secretary B Challianngura hnen aṭanga thu dawn danin, Tuipuiral huam chhungah hian khua 23 a awm a, chung zinga khaw 20 chuan ráltlân mikhual an nei mek. Ráltlân awm tamna ber Fárkawnah chuan nimin khan mi 666 an awm mek a ni.

Ráltlân awm tamna ber dawttu Vaphaiah mi 208 awmin, Khawbungah mi 180, Thekte-ah mi 136 leh Zawlseiah mi 100 an awm mek a; mi 10-99 inkar awmna khaw panga awmin, a bak zawngah mi 10 tling lo an awm bawk.

B Challianngura chuan, Tuipuiral Group YMA-in a rel angin Zawlseiah ráltlânte awmna tur relief camp sak zawh tawh a nih thu sawiin, "Ráltlân mi 90 dah luh tawh an ni a, mi dang awm duh tan pawh hmun a awm tawh rih lo," a ti.

Tuipuiral YMA Secretary chuan, ráltlân Covid-19 laka invên nan Farkawn leh Vaphaiah temporary relief camp sak leh an tum thu sawiin, "Rawn lut thar reng reng chu temporary relief camp-ah ni sarih chhung dah zel phawt an ni ang a, temporary camp-a ni sarih an awm hnuah Rapid Antigen Test hmangin an swab sample endik a ni ang," a ti a, RAT negative-te chu Zawlsei relief camp-ah dah zel tur a nih thu a sawi.

Tuipuiral Group YMA hruaitute chuan, Mizoram chhung leh páwn hmun hrang hrang aṭangin ráltlânte ṭanpuina chi hrang hrang an dawn tawh thu an sawi a; tunah chuan harsatna lian tham an neih rih loh thu an sawi bawk.