Nuai 44.30 sênna AMC Eco Park Kum hnih chhungin a chhe nghal

Aizawl Municipal Corporation (AMC)-in Mission Vengthlang thlân­muala cheng nuai 44.30 sénga Eco Park a siam chu zawh fel tawh anga sawi a nih laiin hmanraw ṭhenkhat dah a la ni lo a; kum hnih hnuah thil eng emaw zat chu a chhe leh tawhin, a ram tawh.

Mission Vengthlanga AMC Eco park hi thla 12 chhunga siam zawh tura tih a ni a, siam zawh a ni tawh anga sawi a nih laiin hmanraw ṭhenkhat dah a la ni lo. Hna thawhna pawisa ṭum hnih pêk chhuah a ni a, contractor hming lang chu Biakliana, Sikulpuikawn a ni.

Vanglaini-in RTI Act hmanga a zawhna AMC SPIO-in a chhan danin, 'Mission Vengthlang Eco Park near Tlawng River' tih, Mission vengthlang thlan­muala siamna senso chu Rs. 44,30,000 a ni a; AMC Commissioner-in January 14, 2019-ah work order a tichhuak a, work order chhuah aṭanga thla 12 (January 14, 2020) chhunga siam zawh tura tih a ni.

Mission Vengthlanga Eco Park siam zawh hun tur leh a dinhmun zawhna chu AMC SPIO chuan, “Work order issue aṭanga thla 12 chhunga thawh zawh tur a ni a, tunah hian thawh zawh a ni tawh e," tiin a chhang.

Zawhna dangah, "Eco Park-a bungrua dah tur zingah naupang infiamna 5 nos (panga) tih loh chu dah a ni tawh. Naupang infiamna 5 nos hi a bungrua lei fel vek tawh a ni a, eng emaw rokhawlhna avangin vuah fel a la ni lo," a ti thung.

Mission Vengthlang Eco Park siamna atan hian AMC chuan June 7, 2019 leh November 11, 2019-ah running bill an pe chhuak. Hnathawh chu AMC official-te'n a hmunah vilin an endik ṭhin a, report erawh a hranpaa siam a nih loh thu chhannaah tarlan a ni.