Mayor leh official-te'n BSUP CCC tlawh : BSUP-a awmte ICFAI-ah sawn an ni dawn

Covid-19 veite enkawlna Basic Services for the Urban Poor (BSUP), Durtlang Covid care centre (CCC)-a awmte chu ICFAI University CCC-ah sawn an ni dawn a; hemi kaihhnawihah hian July 13, Thawhlehni khan Aizawl mayor Lalrinenga Sailo hoin sorkar official-te'n BSUP an tlawh.

July 12, 2021-a Health Minister hoa thu­­neitute ṭhukhawm chuan Durtlang BSUP chhakah lei tawlh theia ngaih hmun thumah a awm a, BSUP chu fûr lai chuan luah loh a ṭhat zawk avangin tihruah an rêl. BSUP chu enfiah nawn tur leh CCC atana hual lawkte en thlithlai turin AMC Mayor kaihhruai UDPA, DMR, GMR, Aizawl DC, PHED, PWD, PE leh Health department hotute an ruat a ni.

Vanglaini palai zawhna chhangin mayor Lalrinenga Sailo chuan, BSUP complex chu July 13 khan an enfiah nghal thu leh mithiamte zirchianna aṭangin a chhak lamah lei/ pialtlêp tawlh palh theia ngaih pathum vel a awm thu a sawi a, "BSUP kalchilhin a enkawltute chu sorkar thil tum leh thil nih dan kan hrilh a, chî-âina tur erawh a awm lo," a ti.

Durtlang BSUP-ah chuan chhiatna a thleng ngei dawn tihna a nih loh thu sawiin Mayor chuan, "Sorkar laipuiin Covid-19 enkawl nan a him leh him loh an rawn zâwt ṭhin a, mithiamte zirchiantir niin, tunah chuan hlauhawm sign thar a awm lo. Mahse, fûr a inṭan tawh a, ruahsur tam dan tur leh chhiatna a thlen dawn em tih hriat lâwk theih a nih loh avangin fimkhur thilah tihruah ṭha tih a ni," a ti a; hma an lak nghal thu a sawi.

Lalrinenga Sailo chuan, BSUP an tlawh laiin hripui vei enkawl mek mi 194 an awm thu sawiin, "BSUP-ah hian hripui vei dah luh belh a ni tawh dawn rih lo. Vawi khata sawn chhuah vek a rem dawn lo a, enkawl damte an chhuah thàwl zel hnua mi 20 emaw vel an awm hunah ICFAI University-ah sawn chhuah vek an ni ang. ICFAI hi mi 100-150 vel awm theihna tur a ni," a ti.

Aizawl Mayor sawi danin, ICFAI University a khah chuan Falkland Venga Rajiv Awas Yojan (RAY) building, Myanmar ráltlânte awmna chu CCC atan ruahman a ni a, a hma pawhin CCC atan hman a lo ni tawh. RAY-a awm mek ráltlânte chu Synod Camping Centre, Neihbawiha dah turin Synod-in a phalsak tawh a ni. A ṭul angin Luangmuala Youth Hostel CCCC chu CCC atan hman rilrûk a ni bawk.

Aizawl dinhmun a ṭhat loh thu sawi Mayor chuan, "ZMC-ah kan leng lo a ni ta mai a, CCC leh CCCC-ah symptom neite dah a ngai tawh. Sorkar, NGO, kohhran leh LTF-te'n theihtawp an chhuah vek a, chuti chunga hri vei kan pung zel mai hi a manganthlak tak zet," a ti a; Aizawl mipuite chu fimkhur taka awm vek turin a chah a ni.