Covid-19 vei mi pahnih thih belh

Nimin khan tlai dar 5 thlengin Mizoramah Covid-19 vei mi pahnih an thi a; sorkar chhinchhiah angin hripui vanga thi mi 115 an ni tawh.

Covid-19 vei enkawl lai Ṭialhaia (90) h/o Biak­chhungi, Ṭawipui South, Lunglei district chu nimin chhun dar 12:30 khan State Referral Hospital (ZMC)-ah a thi a; sorkar chhinchhiah angin, hripui vanga Mizo­rama thi 114-na a ni.

Lunglei aṭanga thu dawn danin, Ṭialhaia hi a damloh avangin inenkawl turin Lunglei Chanmari-a a fate hnenah a awm a, chuta a awm lai chuan Covid-19 positive a ni tih June 28, 2021 khan hmuh chhuah a ni. Hripui a vei tih hmuh a nih hnuah Lunglei Pukpui CCC-ah enkawl a ni a, hniam lam a pan avangin July 8 khan SRH-ZMC-ah sawn a ni.

Nimin chawhnu dar 2:45 khan K Sanglura (93) h/o Biakkimi, Lawngtlai Chandmary chu Covid-19 vangin SRH-ZMC-ah a thi a, vawiinah Lawngtlai Chanmary BCM Kohhran hall-ah vui a ni ang.

Thu dawn danin, K Sanglura hi Chhinga Venga a tu leh fate bulah hun eng emaw chen a awm tawh a, chuta ṭang chuan Covid-19 positive a ni tih July 8, 2021 khan hmuh chhuah niin, SRH-ah dah luh nghal a ni. Chhinga Venga a chenpuite pawh hripui vei vek an ni bawk.