KHAWTHLIR

Thisen pe
Sakawrtuichhun Branch YMA chuan an platinum jubilee pualin nimin khan an hall-ah Civil Hospital, Aizawl tan thisen unit 56 an pe a, petute mipa 49 leh hmeichhia pasarih an ni. Kolasib Khuangpuilam Branch YMA Chawngbawla Section pawhin nimin khan District Hospital-ah thisen unit 10 an pe bawk.

Restricted area
Trinity Hospital, Melthum (Silaimual)-a thawk zingah Covid-19 vei eng emaw zat hmuh chhuah a nih avangin Aizawl DC chuan nimin khan damdawi-in chu chawlhkar khat chhung atan restricted area-ah a puang. Restricted area-a puan chhung hian Aizawl West CMO-in active case search leh follow-up an nei dawn a ni.

CMRF sum sem
Committee on Utilization of Chief Minister's Relief Fund for Covid-19 chuan, July 13, Thawhlehnia an rêl angin nimin khan Aizawl khawpuia LTF 31 hnenah Rs. 20,000 ṭheuh an pe. Pawisa hi a vaiin Rs. 6,20,000 a ni a, Aizawl DC kaltlanga sem a ni.

Containment hlîp
Armed Veng South-a chhungkaw 29 awmna, Saron Venga chhungkaw paruk awmna, College Venga chhungkaw pakua awmna leh Dawrpui venga chhungkaw pasarih awmna containment area-a puan tawh chu nimin khan hlih a ni.

Inremna ziak
Mizoram Truck Drivers Association leh Hnahthial North-I Village Task Force hruaitute chu an inhmuh thiam lohna chungchangah nimin khan FCSCA director Ramdinliani hoin a pisaah an inbia a, inremna an ziak. MTDA-in Hnahthial-a buhfai leh thil dang phurh an chawlhsan chu chhunzawm leh turin thu an titlu a, ngaihdam an ngaihna laiah an inngaihdam tawn thu ziakin an dah. Thil duhawm lo a thlen tawh lohna tura hmalakho an remti bawk.