Sports Minister-in Lalremsiami thláwp turin mipui a sáwm

Sports & Youth Services minister Robert Romawia Royte chuan nimin khan a pisaah Tokyo Olympics 2020 atana India Olympics official t-shirt a sem a; Mizoram aṭanga Olympics-a tel tur Lalremsiami thláwp tlat turin Mizo mipui a sáwm.

Lalremsiami leh India team-te duhsakna sang ber a hlan thu sawiin Robert Romawia chuan, "Sorkar laipui duh danin state tinah Olympics tihlârna atan leh India team thlàwpna tihlanna atan Olympic photo booth siam a ni a, Mizoram State Sports Council pawhin hmun hrang hrangah photo booth leh selfie point-te a siam a ni," a ti a; photo booth-ahte thla laa Indian Olympic team-te thlàwpna social media-ah uar taka tilang turin SYS department-in mipui an sâwm tih a sawi.

India Olympics official t-shirt hi Sports Authority of India, Ministry of Youth Affairs & Sports chuan Mizoram Sports department hnenah an rawn thawn a; Union Sports Ministry ruahman angin Chief Minister, Deputy Chief Minister, Speaker, Deputy Speaker, minister, SYS department hotu te, Olympian C Lalremsanga leh coach-te pek a ni ang.