Aizawl district-a Covid-19 léng sawiho

Aizawl DC Dr Lalhriatzuali Ralte kaihhruaiin nimin khan DC conference hall-ah sorkar, páwl leh khawtlang hruaitute'n Aizawl district-a Covid-19 léng chungchanga hmalak dan tur an sawiho.

Aizawl SP C Lalruaia chuan, lockdown chhunga duty ṭhenkhatin Covid-19 an vei avanga harsatna an tawh thu a sawi a, "Covid-19 chungchanga nun dan dik ngaih pawimawh hi mipui tihmâkmawh a ni," a ti.

Social Welfare department hotute chuan, centre 45 zinga 38-a awmte chu Covid-19 vaccine first dose pek a nih tawh thu an sawi a, Aizawl district-a centre palite'n tun kar chhungin vaccine first dose an lak theih an rin thu an sawi bawk.

Aizawl district-ah Maxicab Owners’ Association (MCOA) member 200 vel an awm a, thla hnih chuang lockdown-in an eizawnna a nghawng dan sawiho a ni. MCOA aiawhte chuan, sorkarin rate ennawn se an duh thu an sawi.

Zoram Taxi Drivers’ Asso­ciation (ZTDA) hruaitute chuan, Aizawl district-ah member 2,500 vel an awm thu sawiin, an service danah rawtna an thlen a; chawlhkar khat chhungin ni hnih an tlân theih mek thu sawiin, "Kan tlan loh ní-ah pawh zing dar 9 hma leh tlai dar 5 hnuah service phal ni se, chu chuan lockdown chhunga kan eizawnna nasa takin a puih kan beisei," an ti.

Aizawl Two Wheeler Taxi Association leh Aizawl City Bus Owners Association aiawhte pawhin an harsatnate an sawi bawk.

Lirtheia eizawngte chu theihtawp a chhuahpui tur thu Aizawl Bawrhsap a sawi.

Meeting chuan, online exam-a harsatna hrang hrang - kawlphetha awm lo leh network ṭha tâwk lo chungchangah, a ṭul a nih chuan Power & Electricity department leh network operator-te hnenah ngenna thlen an rel a ni.