Vairengte VC leh tlawmngai pawlten An bialtu MLA hmalakna an fak

Vairengte Joint Village Council leh pawl hrang hrang - MHIP, MZP, MSU, SORE leh Vairengte Ṭhalai Pawlte chuan thuchhuah inṭâwm siamin, ramri chungchangah Serlui bialtu MLA Lalrinsanga Ralte-in theihtawpin hma a la niin an tarlang.

Vairengte VC leh NGO-te chuan, MZP Gen.Hqrs.-in ramri chungchangah Serlui bialtu MLA chu lemchang angah an puh nia sawiin, "Hriatthiam harsa kan ti hle. Bialtu MLA hian a theih ang anga hma lain, a thiam ang tâwka min ṭawng thlamuanna thu la kâwia political party press release ang maia thuchhuah siam hi bial mipui leh MLA zah lohnaah kan ngai," an ti.

Ramri chungchangah an MLA-in theihtawpin hma a la nia sawiin Vairengte VC leh NGO-te chuan, "Kan MLA hmalakna hi a hmuna awmte leh rawn kalte chuan kan hre chiang. Tun buaina a rawn la kal lo leh MLA/mipui hmalakna pawh hre chiang loa Aizawl tlanga duh zawng zawng sawi hi bànsan se ṭha kan ti a ni," a ti a; ramri-ah lungrual taka ṭanho ṭha an tih thu an tarlang.