Assam-in an luah mek Mizote ram chhuh lêt turin Mizoram sorkar phût

Ramri bula Mizote huan leh thlai awmna hmun tun hnaia Assam lamin an luah tâkte chu chhuh let a, Mizote ngei luahtir leh vat turin Youth Block Congress Committee chuan Mizoram sorkar an phût. Tun hnaia Mizoramin a ram chin a chànte an tarlang bawk.

Serlui Congress ṭhalaite chuan, Serlui bial chhunga Mizoram chin humhim a, Mizote ram chu luahlumtir leh ngei turin sorkar an phût tih tarlangin, "Ruling party-in Serlui bialtu MLA Lalrinsanga Ralte, MLA chak tak an tih hian kan Mizo unaute mangang au thâwmah hian MLA chak tak a nihna lantir ngei rawh se," an ti.

Serlui Congress Ṭhalai tarlante
1. Kum 2011-ah Vairengte Aitlang hnár lam Darthanzauva ram leh a ram ṭhenawmah Assam-in huan neitute an tibuai a, boruak a sosang hman a, silai hmeh puah niin, thisen a lo chhuak tawh. Hemi ṭum hian pi leh pute aṭanga Mizoram nia chhàl chin chu lâk lêt leh vek a ni. Tun ṭumah pawh hian MNF sorkar hi hnung tawlh lo a, Mizote ram hi luahlumtir leh ngei turin kan phût.
2. Kum 2020 tàwp lamah Vairengte auto stand-a Mizo IR duty-te Assam mite'n an tibuai a, Vairengte mipuite'n an chháng lêt a, Assam mite'n Mizoram chhunga in an sak leh dawrte tihchhiat a ni. Police-te erawh chu auto-rickshaw stand bâk pêl lo turin sorkarin a ti. Lailapur cinema hall hlui chu MNF sorkar hnuah Assam lamin an chei ṭha a, an luahlum mek.
3. Saihapui-V khuaah Covid-19 vanga IR duty-na hmun hum zo loin a hnungtawlh zawngin kan kal. IR duty post aṭanga km. 1 vela hlaa Mizote'n chawlhbuk an sakna leh, IR duty post leh chawlhbûk inkar, Mizoin leilet leh huan an siamna ṭhin chu MNF sorkar hnuah Assam police-in an luah vek tawh.