COVID-19: Mizoram dinhmun : Hripui vei 468 hmuh belh a ni

July 13, Thawhlehni khan Mizoramah Covid-19 vei mi 468 hmuh chhuah a ni a, thla kal mek chhungin mi 4,678 hmuh chhuah a ni tawh. Nimin khan hripui laka fihlim tawh mi 59 chhuahtir an ni thung.

Covid-19 vei hmuh tharte chu mipa 216 leh hmeichhia 252 niin, Aizawla veng 49 leh khua/hmun dang 31-a mite an ni a; ZMC laboratory-a hmuh chhuah mi 104, TrueNAT-PCR hmanga hmuh mi 17 leh RAT hmanga hmuh mi 347 an ni.

Hripui vei hmuh thar mi 468-te chu natna lang chhuak 225 leh lang lo 243 an ni a; tualchhunga kái 266 leh state páwn aṭanga lut pahnih niin, tualchhunga kái zingah kàina chin hriat loh mi 207 an awm. Nimin zinga Covid-19 positive result a chhuah hnuah enkawl mek mi 5,063 an awm a, an tam lai ber a ni.

IDSP record angin, Mizoramah Covid-19 vei mi 25,170 hmuh chhuah a ni tawh a, mipa 14,036 leh hmeichhia 11,134 an ni. Nimin tlai dar 5 thleng khan mi 20,054 (79.67%) chhuahtir an ni tawh a, mi 115 (0.46%) thi tawhin, enkawl mek mi 5,001 (19.87%) an awm.

July 13, Thawhlehnia swab sample endik dan chu - ZMC laboratory-ah 1,470, TrueNAT hmangin district 10-ah 386 leh RAT hmangin district 10-ah 2,973 a ni a, a vaiin sample 4,829 (mipa 2,482 leh hmeichhia 2,347) niin, chuta ṭanga hripui vei hmuh chhuah 468 chu 9.69% a tling.

Thawhlehnia district-a Covid-19 positive hmuh dan chu - Aizawl district-ah mi 327, Lungleiah 49, Lawngtlaiah 46, Kolasib-ah 34, Siahaah pariat, Saitualah pathum leh Hnahthialah pakhat an ni. ZMC-a hmuh chhuah mi 104-te chu tualchhunga kái vek niin, hri kai tawhte nena inhnaihna nei vek an ni a; symptom nei mi pariat an awm. Hmuh chhuah zingah healthcare worker pakua leh frontline worker pakhat an tel.

TrueNAT hmanga hmuh chhuah mi 17-te chu tualchhunga kái 11 leh state páwn aṭanga lut pakhat an ni a, symptom nei pali leh kàina chin hriat loh 11 an awm. RAT hmanga hmuh mi 347-te chu tualchhunga kài 346 leh state páwn aṭanga lut pakhat an ni a; tualchhunga kái zinga mi 169 chu kàina chin hriat loh an ni.

Mi 468 zingah naupang kum tling lo 130 chuang awmin, a zatve velin symptom an nei a, nausén kum khat tling lo pasarih an tel. Kum 60 chung lam mi 30 chuang awmin, symptom nei eng emaw zat an awm a; symptom nei zingah a upa ber kum 91 mi pawh a tel a ni.

Nimin khan tlai dar 5 thlengin hripui laka fihlim tawh mi 59 chhuahtir an ni a; Lunglei district-ah mi 23, Aizawl District-ah 12, Mamit district-ah 11, Hnahthial district-ah panga, Kolasib leh Lawngtlai district-ah pathum ve ve leh Serchhip district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 7,613 hmuh chhuah a ni tawh a, TrueNAT-PCR hmangin 1,621, RAT hmangin 15,935 leh Guwahati-ah pakhat hmuh chhuah a ni tawh.

IDSP tarlan danin, July 13, 2021 thlengin Mizoramah swab sample 5,36,404 endik a ni tawh a, chu'ng aṭanga Covid-19 positive hmuh tawh zat 25,170 chu 4.69% a ni. Hripui vei hmuh tawh zinga mi 21,209 chu Mizoram chhunga kái chhâwng an ni a, mi 3,961 chu Mizoram páwn aṭanga an rawn luh hnua hmuh chhuah an ni.