Hachhek bialah hripui vei an pung chak

Hachhek Constituency Development Committee (HCDC) chuan, tun hnaiah Hachhek bial chhungah Covid-19 vei an pung chak tih tarlangin, damdawi leh enkawltu lamah harsatna an tâwk chho dawn nia an hriat thu an sawi a; damdawi leh thawktu chungchangah harsatna an tawh loh nan chak zawka hma la turin sorkar an ngen.

HCDC thuchhuah chuan, Hachhek bial chu Tripura leh Assam ramri depa awm a nih avangin luh leh chhuahna kawngte sorkarin khauh zawkin véng se an duh thu leh, swab test awlsam zawka neih a nih theihna turin sorkarin hma la se an duh thu a tarlang.

HCDC chuan, nimin chawhma thlenga hripui vei tam zualna khaw pathum dinhmun an tarlang a; an tarlan danin, in 230 awmna Bungṭhuamah Covid-19 vei mi 28 leh home quarantine chhungkaw 80 chuang, in 100 awmna Zawlpuiah positive 61 leh home quarantine chhungkaw 32 leh, in 260 awmna Thinghlunah positive 13 leh home quarantine chhungkaw 57 an awm a ni.