YMA kumpuan hawn a ni ; Court thubuaiah YMA-in Rs.4,30,000 sêng tawh

Central YMA chuan January 30, Thawhlehni zan khan Vanapa Hall-ah kum 2018-a YMA kumpuan, 'Ram leh hnam humhalh' hawnna inkhawm an buatsaih a, CYMA president hlui Lalbiakzuala'n a hawng. CYMA president Vanlalruata chuan, Bru leh Chakma ten Supreme Court-a an hêk avangin YMA-in Rs. 4,30,000 a sêng tawh tih a sawi.

Lalbiakzuala chuan, YMA kumpuan chu YMA branch awm tawhna apiangah phûr taka bawhzui a nih theih nan leh a bawhzuitute pawhin ram leh hnam damna a ni tih hria a, ṭhahnemngai taka hmalakna tura tih hrang hrangte an bawhzui theih nan kumpuan thupui chu a hawng tih a sawi.

'Ram leh hnam humhalh' tih chu YMA-in kum 12 chhung kumpuanah a lo hmang tawh tih sawiin Lalbiakzuala chuan, khawvel ṭhang zelah ṭhalai, YMA member-te sûkthlêk a danglam zel a, ram leh hnam humhalh tih chu kumpuanah hman nawn fo a ngai tih a sawi a, "Hun kal tawhah a hlawhtlinna tam tak kan hmuh a ni. He kumpuan hi kan hmang nawn a, mi tam takte'n kan la mamawh a nih vanga hmang kan ni," a ti.

Lalbiakzuala chuan, kumpuan kaihhruai­nain tihhlawhtlin tur a sawi point hrang hrang 30 zingah, electoral roll-a chuang lo tur hming chuang te, Mizo nula zinga hnam dang pasal nei tam ta lutuk te, ruihhlo vanga buaina te, zu vanga chhiatna a tamzia te, ram rohlu thing leh mau tihchereu nasat lutuk vangtein 'Ram leh hnam humhalh a ngai hle tih a lan chian thu a sawi.

Mizoram chu ziak leh chhiar thiam tam lamah sang viau mah se, central service hrang hrangah lut an tlem tâk avangin inen lêt a ngai thu a sawi a, "Kan lehkha thiamnate hi enzawnna tling khawpin kan kalpui pha ta lo em ni tihte ngaihtuah a ngai khawp mai. Sumdawnna kawnga hnam dang kan kawp nasa lutuk te, sum duh vanga kan zahawmna tam tak kan hlohte hi tu thiam loh nge tih i inzawt ang u," a ti.

Lalbiakzuala chuan, YMA-in ram leh humhalh nan leh ruihhlo doa hma a lakna hre chiang lo an awm ṭhin chu vanduaithlak a tih thu sawiin, "Kan thawhsak ṭhalaite hi engtin nge kan hrilh ang tih hi vei thar ang u, kan vei loh chuan kan hmabak a êng lo khawp ang," a ti a; châwm hlâwm ngai ṭhalai an tam ta lutuk chu YMA kumpuanin ṭhiah a tum zinga mi a nih thu a sawi.

CYMA president Vanlalruata pawhin thu sawiin, YMA kumpuan 'Ram leh hnam humhalh' chu kum 1998 aṭanga hman ṭan a nih thu a sawi a, "A hlawhtlin leh zual nan kawng hrang hrangin hmalakna tur ruahman a ni," a ti.

Bru leh Chakma chungchangah Vanlal­ruata chuan, "Tuikuk leh Chakma ten an thiam tawpin min hêk reng a, Supreme Court-a min hêk vangin Rs. 4,30,000 kan sêng tawh a ni. Mikhual chám reite vangin heti zat sum kan sêng a, sên a la ṭul fo turte hian rilru a tina hle a ni," a ti a; YMA inkhawmpui lianin a rel tawh angin, Chakma Autonomus District Council ṭhiah a nih ngei theih nan hma an la zel dawn tih a sawi bawk.

CYMA general secretary Lalhmachuana'n report a pek danin, CYMA hnuaiah sub-headquarters panga, group 47 leh branch 805 a awm mek a; YMA member zat chu 4,04,722 a ni a, mipa 2,47,467 leh hmeichhia 1,57,255 an ni. SRS din thar leh aṭanga January 30 thleng khan SRS-in ruihhlo Rs. 14,16,98,095 hû an man tawh.

YMA kumpuan hawnna inkhawm hi CYMA vice president R Lalngheta'n a kaihruai a. Aizawla YMA branch hrang hrang aṭangin hruaitu mi 650 chuang an tel a ni.