Mahni hnam aia hnam dang ngaisang zawkte an awhawm lo - R Lalzirliana

ZoRO chuan nimin khan Lal Thanhawla Auditorium-ah Chin-Lushai Conference kum 126-na an lawm a, Home minister R Lalzirliana'n a hmanpui. Minister chuan, mahni hnam aia hnam dang zia ngaisang zawkte an awhawm loh thu a sawi.

Inkhawm hi ZoRO vice presi­dent Rohmingthanga Kawlni-in a kaihruai a; R Lalzirliana chuan, "Hnam hian nihna (identity) a ken tel avangin hnamah kan chian a ṭul a, mahni hnam aia hnam dang zia ngaisang zawkte nun hi a awhawm loh. Kan hnam dinchhuahna atana tha thawhtute hlutna theihnghilh loin, hnam dang karah kan hnam zia chhuanawm tak tak i pholang zel ang u," a ti.

Home Minister chuan, Zo fate insuihkhawm tura ṭhahnem­ngaihna rilru neih a pawimawh thu sawiin, "Hemi atana hma latute kan hre reng a. ZoRO hian hnam inpumkhatna ṭha zawk kan neih theih nan nasa takin an thawk a, United Nations thlengin hnam tan hma an la a ni," a ti a; ZoRO hmalakna chu chhuanawm a tih thu a sawi.

Mizote chu ram inrêlbàwlna avangin India, Bangladesh leh Myanmar-ahte ṭhendarha an awm thu sawiin Lalzirliana chuan, "India ramah pawh state hrang hrangah kan awm darh mek a, ṭhendarha kan awm avang hian zawi zawiin kan rilru pawh a hrang tial tial niin a lang," a ti.

R Lalzirliana chuan, Mizo hnam nihnain ramri a kân a ngaih thu sawiin, "Tlang hranga cheng kan nihna avangin kan rilru pawhin

ramri a kân ve a ngai. In­ngaih­damna aṭangin kan in­unauna hi kan siam ṭha theiin a rinawm," a ti a; hnam ropui leh changkang apiangin hnama chian pawimawhna an hre thar zel a, mahni chawr chhuahna hnam nun theihnghilh lo turin sum leh tha an sên hreh loh thu a sawi.

ZoRO president R Sangkawia pawhin thu sawiin, ṭhalaite'n Mizote dinhmun chiang taka an hriat a pawimawh thu a sawi a, "Chin-Lushai Conference hmasa ber chu January 29, 1892 khan sipai hmunpui Fort William-ah neih a lo ni tawh a ni," a ti a; ZoRO hmalakna hrang hrang leh hmachhawpte a tarlang.