PWD leh YMA-te'n kawng an sawiho

YMA General Conference vawi 71-na thurel pakhat, 'Mizo­ram hmun hrang hranga inkal­pawhna kan neihte hi tun aia ṭha leh changtlung zawka siam a nih theih nan Central YMA-in hma la rawh se' tih bawhzuina atan CYMA hruaitute leh PWD hotute chuan nimin khan PWD Engineer-in-Chief pisaah kawng chungchang an sawiho a, PWD minister Lal Thanzara'n a hmanpui.

PWD Minister chuan, ram hmasawnna hnuk pawimawh ber chu inkalpawhna a nih thu sawiin, "Mizoram kawngte a ṭhat a, a lo

changtlun zawk theih nan CYMA leh PWD-in inkawmna hun remchang siam a ni hi a lawmawm hle. Mizoram kawng dinhmun ṭha lo leh duhthusam lo lai a awm a, PWD-in a enkawl chin kawng siamṭhat hna theihtawpa chhuah a ni ang," a ti.

Lal Thanzara chuan, PWD engineer-te chu an hnathawhnaah theihtawp chhuah tura chahin, YMA hmalakna hrang hrangte'n ram hmasawnnaah awmzia thui tak a neih ṭhin avangin an inhmuhkhawmna chuan rah ṭha a chhuah ngei a beisei thu a sawi.

Mizoram PWD-in a enkawl chin ni lo kawng eng emaw zat a awm thu sawiin PWD Minister chuan, "Chu'ngah chuan sorkar laipuiin a thawktu tur contractor a thlang ṭhin a, an hnathawh kalphungah state sorkar a inrawlh vek thei ṭhin lo," a ti.

Meeting-ah hian PWD Chief Engineer (Highways), Chief Engineer (Buildings) leh Chief Engineer (Roads) ten an bial chhunga kawng siam mek leh enkawl hna hrang hrangte an sawifiah a; YMA hruaitu kalkhawmte'n hriat duh an neih leh hriatthiam loh an neihte chu PWD hotute'n an chháng. Inkawmhona hi a ṭul leh remchang anga la neih chhunzawm zel tura ruahman a ni.

Meeting-ah hian YMA aṭangin CYMA president Vanlalruata hoin CEC member leh sub-head-quarters YMA hruaitute an tel.

Meeting-a tarlan danin, kum 2016-17 chhung khan PWD chuan hnathawh nan cheng vbc. 894.58 an hmang a; chu'ng sumte chu central, state leh páwn lam agency hrang hrang aṭangin an hmuh bakah, PMGSY aṭangin cheng vbc. 75.53, National Highway fund aṭangin vbc. 56.38 leh chhiah cheng vbc. 7.94-te a ni.

Mizorama inkalpawhna kawng­pui, Mizoram PWD-in a enkawlte chu - national highway km. 1414.318, state highway km. 170, major district road km. 601.40, district road dang km. 978.30, village road km. 1,863.147, khaw chhung kawng (roads within towns & villages) km. 704.912 leh Aizawl khawpui chhung kawng km. 297.410-te a ni a; a vaiin km. 6,029.487-a thui a ni.