Léng khuain khaw fai ber nih an lawm

Serchhip district-a Lêng khua chuan January 30, Thawhlehni khan an khuaa Saihnuna Hall-ah Mizorama thingtlang khaw inrêlbâwlna ṭha leh khaw fai ber atana puan an nih lawmna hun an hmang a, bialtu MLA Vanlalawmpuii Chawngthu, minister-in a hmanpui.

Vanlalawmpuii Chawngthu chuan, Lêng khawtlang ṭanrualna te, hruaitu fel leh vengva tak an neih vang te, mipuiin faina leh khawtlang rorelna ṭha an duh vangtein lawmman ropui tak hi an dawng thei tih a sawi a, "Kawng tinrenga hmalakpui a, a ṭul ang zela ṭanpui reng ṭhintu East Lungdar BDO leh Serchhip DRDA Project Director-te hmalakna pawh a chhuanawm hle a ni," a ti.

Vanlalawmpuii chuan dik taka hna a thawh theih nana ṭawngṭaipui ṭhin turin mipui a sáwm a, "Khawtlang hruaitute chu eng ang mi pawh ni se, thlei bik ka nei ngai lo," a ti a; lungrual taka thawhhoa hmasawn tlan dial dial chu a duh ber a nih thu a sawi.

Bialtu MLA hian Léng khuain Mizoram khaw inrêlbâwlna ṭha leh fai ber an lawmna senso atan Rs. 2,00,000 a pe a ni.

Léng khuain lawmman an dawn lawmna hi V/C president B Lalfinga'n a kaihruai a, Serchhip DC aiawha tel SDC Beitlotha Nohro leh East Lungdar BDO Vanlalṭanpuia te pawhin thu an sawi.

Sorkar laipui chuan October 1 -15, 2017 khan intihsiakna hmangin Missions Antyodaya - Gram Samridi Evam Swachhata Pakhwada bul a ṭan a; India rama thingtlang khua nuai 2.6-te chu inrelbawlna ṭha leh faina (village well being & cleanliness forthnight)-ah inelna neihtirin, Mizoramah pawh kalpui a ni a, Mizoramah chuan Leng hi pakhatna an ni.