Driver-te tan free eye camp buatsaih

Excise & Narcotics department (END) leh Pernod Ricard India Pvt.Ltd. te chuan nimin khan Aizawl City Bus Owners Association (ACBOA) pisa, Ngaizelah khualzin leh bungraw phur lirthei khalhtute tan ni hnih awh tur Free Eye Camp an buatsaih a, END minister R Lalzirliana'n a hawng.

Hawnna inkhawm hi END secretary KT Beicho-in a kaihruai a; Excise & Narcotics Minister chuan, lirthei khalh­tute'n dan an ngaih pawimawh a ṭul thu sawiin, lirthei an khalh avangin anmahni nunna mai bakah, mi dangte nunna an kutah a awm tel a ni tih hria a, zu leh ruih theih thil dang laka an fihlim a ṭul thu a sawi.

R Lalzirliana chuan, driver-te chu rûi chunga lirthei khalh loh tur leh, fimkhur leh hawihhâwm taka khalh turin a chah a; lirthei inpelh chungchangah pawh hawihhâwm leh mi dang ngaihchân thiam a ṭul thu sawiin, inpelhtir theih reng chunga mi dang kawng ken duh loh chu dan bawhchhiatna a nih thu a sawi.

Driver-te tana a thlawna mit entirnaah hian nimin khan driver eng emaw zatin an mit an entir a, vawiinah chhunzawm leh a ni ang. Aizawl Civil Hospital-a Department of Opthalmology -a HoD Dr Enghmingliani Ralte leh opthalmic assistant pahnihin driver-te mit an ensak a ni.