Khawlaia bawlhhlawh dah khawm MNYF-in misual thil tihah an ngai

MNF ṭhalaite chuan thuchhuah siamin, tun hnaia Aizawl khawpui khawlaia bawlhhlawh chhêk khâwl chu ngun taka kan enfiah hnuah, misual chetnaa an ngaih thu an tarlang.

MNYF chuan nimin khan an president Lalrinawma hoin a room-ah general secretary meeting an nei a, Aizawl Municipal Corporation mayor PC Lalhmingthanga pawh a tel a, AMC hmalakna chungchang an zawtfiah. Thuchhuah an siamah, tun hnaia Aizawl khawlai hmun ṭhenkhata bawlhhlawh chhêk khâwl chu AMC sorkar tihmualpho tuma politics game ṭha lo kheltute thil tiha an ngaih thu an tarlang a ni.

MNYF chuan, "Kulikawna bawlhhlawh chhêk khawmah leivûng leh hnim tam tak dah a ni a, Khatla kâwnah zan dar 12 velah pickup-in bawlhhlawh a bun lai hmuh a ni a, vawkte thi a tel nghe nghe," an ti a; Congress Bhavan thlanga bawlhhlawh chhêk khawl ṭhin pawh mimal in awm tam lohna a nih avangin misual thil tih a nih an rin thu sawiin, "Congress Bhavan thlang hi tun thlenga Aizawla bawlhhlawh chhêk khawlna awmchhun a ni tawh avangin a ṭul chuan MNF ṭhalaite'n tlaivarin kan vêng dawn a ni," an ti.